«Հաշտարարության, այդ թվում պարտադիր հաշտարարության ներդրումը առաջընթաց է մեր դատական եւ իրավական համակարգում, ինչի կարեւորությունն ընդգծված է թեկուզ այն հանգամանքով, որ այս ոլորտի բարեփոխումները ներառված են թե կառավարության գործողությունների ծրագրում, թե դատական եւ իրավական բարեփոխումների ռազմավարության շրջանակներում»,- «Արմենպրեսի» մամուլի սրահում թեմայի վերաբերյալ ասուլիսին նշեց ՀՀ արդարադատության նախարարության «Օրենսդրության զարգացման կենտրոն» հիմնադրամի տնօրեն Դավիթ Ղարիբյանը:
Դավիթ Ղարիբյան
Նրա ձեւակերպմամբ, դեռեւս 2022թ Արդարադատության նախարարության նախաձեռնությամբ այս համատեքստում կատարվել են օրենսդրական ընդգրկուն փոփոխություններ: «Երբ նշում ենք ընտանեկան գործերով պարտադիր հաշտարարությունը, խոսքը գնում է ընտանեկան որոշ գործերի մասին, որոնք կարող են իրականացվել հաշտարարության կարգով, դրանց թվում են, օրինակ, ամուսնալուծության, երեխայի տեսակցության կարգի, ալիմենտի հետ կապված գործերը: Մյուս կողմից, օրինակ, ծնողական իրավունքից զրկելը կամ նման այլ գործերը դուրս են մնում պարտադիր հաշտարարության շրջանակից, որպեսզի պետության մասնակցությամբ դատարանը հնարավորություն ունենա վերջնական վճիռ կայացնելու»,-ասաց Դավիթ Ղարիբյանը:
«Առաջին անգամ մենք պետք է հանրությանը հայտարարենք, որ Արդարադատության նախարարությունը իրականացնում է հնարավոր բոլոր գործողությունները, որպեսզի պարտադիր հաշտարարությունը հուլիսի 1-ից պարտադիր իրավական ուժ ստանա եւ սկսի գործել»,-հավելեց ՀՀ արդարադատության նախարարության «Օրենսդրության զարգացման կենտրոն» հիմնադրամի տնօրենը:
«Պարտադիր հաշտարարության մասին խոսելիս՝ հիմնականում խոսք է գնում 7 տեսակի գործերի հետ կապված: Միայն այդ 7 տեսակի գործերն են ենթակա լինելու պարտադիր հաշտարարության: 2022, 2023, 2024թթ դատական համակարգի տվյալների վիճակագրության համաձայն՝ տարեկան շուրջ 3000 գործեր են, որ ստացվում են դատարաններում, որոնք փոփոխություններով ենթակա կլինեին հաշտարարության միջոցով լուծման:
Կարդացեք նաև
Մարիա Պետրոսյան
Ըստ էության, սա այն հոսքն է, որն ակնկալվում է լուծել պարտադիր հաշտարարության միջոցով, բայց նաեւ ոլորտում կատարված բարեփոխումներն ուղղված չեն միայն պարտադիր հաշտարարության իրականացմանը, այլ, ընդհանուր առմամբ, հաշտարարության ինստիտուտի ներդրմանն են ուղղված Հայաստանում»,- նշեց «Օրենսդրության զարգացման կենտրոն» հիմնադրամի ավագ իրավաբան- փորձագետ Մարիա Պետրոսյանը:
«Ինչու ենք ուզում, որ հաշտարարությունը լայն տարածում ստանա… հիմնականում այն պատճառով, որ հաշտարարությունը վեճերի լուծման ավելի կառուցողական մեթոդ է: Եթե դատական գործընթացներն ավելի շատ մրցակցային բնույթ ունեն, կողմերից յուրաքանչյուրը փորձում է ավելի լավ հիմնավորել իր տեսակետը, վերջում էլ ինչ-որ մեկը հաղթում է, պարտվողն էլ հաճախ համաձայն չի լինում որոշման հետ, ապա հաշտարարության պարագայում այլ է: Հաշտարարությունն, ի տարբերություն դատական գործընթացների, օգնում է, որպեսզի երկկողմանի լինի համաձայնությունը, ինչը նպաստում է նաեւ նրան, որ անգամ եթե կոնֆլիկտ է եղել կողմերի միջեւ, դա չի խանգարի հետագայում հարաբերությունները շարունակելուն»,-մանրամասնեց Մարիա Պետրոսյանը:
Թեմայի վերաբերյալ մանրամասները՝ տեսանյութում
Գոհար ՀԱԿՈԲՅԱՆ
