«Հանդիպումը կայացավ «Հայաստան» խմբակցության պատգամավոր Էլինար Վարդանյանի հետ: Նույն իմ խնդրանքը փոխանցեցի, որը վերաբերում էր վարչապետի անվստահությանը: Տիկին Վարդանյանն ինձ ներկայացրեց այն դիրքորոշումները, որոնք ներկայացվել են «Հայաստան» խմբակցության կողմից, նոր բան այդ առումով չասաց: Խոստացավ, որ իմ խնդրանքը՝ վարչապետին անվստահություն հայտնելու գործընթաց սկսեն նաեւ այլ պատգամավորներ, առաջիկա հանձնաժողովի նիստում կփոխանցի նաեւ հանձնաժողովի մյուս բոլոր անդամներին: Իրենց միանալու գործընթացի վերաբերյալ նոր բան չլսեցի, ինձ համար ընկալելի էր, հասկացա՝ ինչ էր ասում, բայց ընդունելի չէ»,- այսօր ԱԺ «Հայաստան» խմբակցության պատգամավոր Էլինար Վարդանյանի հետ հանդիպումից հետո լրագրողներին հանդիպման մանրամասները ներկայացրեց «Արթուն ենք» շարժման գործիչ Էդգար Ղազարյանը:
-Չեմ ընդունում, որ առանձին պատգամավորական ցուցակը նշանակում է միանալ անվստահության գործընթացին, որովհետեւ անվստահության գործընթացին միանալն իրավական ձեւ ունի՝ նույն նախագծի տակ բոլորի ստորագրությունն է: Որից հետո յուրաքանչյուր պատգամավոր ինքն է դառնում նախագծի համահեղինակ ու սկսում է ջանքեր գործադրել իր նախագիծն առաջ մղելու ու հաջողության հասցնելու համար: Նման պատրաստակամություն «Հայաստան» խմբակցության պատգամավորների կողմից չկա,- հավելեց պարոն Ղազարյանը:
Նրա խոսքով՝ սա պատգամավորների հետ չորրորդ հանդիպումն է, 15 հանդիպում է եղել, որից 11-ը չի կայացել: Դրանց վերաբերյալ հանցագործության մասին հաղորդումներ է Ղազարյանը ներկայացրել, քրեական վարույթ նախաձեռնել-չնախաձեռնելու վերաբերյալ տեղեկություններ չի ստացել:
Արփինե ՍԻՄՈՆՅԱՆ
