Եվրոպայի խորհրդի գլխավոր քարտուղար Ալեն Բերսեն Հայաստան կատարած իր առաջին այցի ավարտին արտահայտել է իր անսասան աջակցությունը բարեփոխումներին և խաղաղությանը
Երևան, 2025 թվականի հունիսի 13 – Եվրոպայի խորհրդի Գլխավոր քարտուղարի պաշտոնում Հայաստան կատարած իր առաջին այցի ժամանակ Ալեն Բերսեն վերահաստատեց կազմակերպության անսասան աջակցությունը երկրի ժողովրդավարական զարգացմանը և կոչ արեց արագորեն ստորագրել խաղաղության համաձայնագիրը Հայաստանի և Ադրբեջանի միջև։
«Զարգացման տեմպը, ժողովրդավարական բարեփոխումների ուղղությունը և իշխանությունների կողմից որդեգրված պրագմատիկ մոտեցումը Հայաստանի շարունակական ժողովրդավարական ներգրավվածության խրախուսական նշաններ են», – ասաց Ալեն Բերսեն իր երկօրյա պաշտոնական այցի ավարտին։
Նա նաև ողջունեց Հայաստանի հանձնառությունը՝ խորացնելու համագործակցությունը Եվրոպայի խորհրդի հետ։
Կարդացեք նաև
«Վարչապետ Նիկոլ Փաշինյանի հետ հանդիպման ժամանակ ես ստացա հստակ ուղերձ. Հայաստանը Եվրոպայի խորհրդին համարում է ժողովրդավարական ճանապարհի իր հիմնական գործընկեր», – ասաց նա։
Բարեփոխումները շարունակական գործընթաց են, և մենք պատրաստ ենք հետևողական աջակցություն ցուցաբերել՝ երկիրն առաջ տանելու համար։
Խաղաղությունը որպես ժողովրդավարական անվտանգության անկյունաքար
Նախագահ Վահագն Խաչատուրյանի, վարչապետ Նիկոլ Փաշինյանի, Ազգային ժողովի նախագահ Ալեն Սիմոնյանի, Արդարադատության նախարար Սրբուհի Գալյանի և միջազգային հանրության ներկայացուցիչների հետ հանդիպումների ժամանակ Ալեն Բերսեն ընդգծեց Եվրոպայի խորհրդի հանձնառությունը Հարավային Կովկասում տևական խաղաղության և ժողովրդավարական անվտանգության նկատմամբ։
«Հայաստանի և Ադրբեջանի միջև խաղաղության համաձայնագրի ստորագրումը երկարաժամկետ կայունության բանալին է։ Մենք վճռականորեն աջակցում ենք այդ գործընթացի ժամանակին ավարտին», – ասաց Ալեն Բերսեն։ «Եվրոպական քաղաքական համայնքի առաջիկա գագաթնաժողովը, որը Հայաստանը պատրաստվում է հյուրընկալել հաջորդ տարի, տարածաշրջանային հանձնառության ուժեղ ազդանշան է։ Եվրոպայի խորհուրդը կշարունակի ներգրավված մնալ և աջակցել՝ ինչպես Եվրոպական քաղաքական համայնքի շրջանակներում, այնպես էլ դրանից դուրս»։
Ժողովրդավարական բարեփոխումների ոլորտում կայուն գործընկերություն
Այցելությունը վերահաստատեց Եվրոպայի խորհրդի հանձնառությունը Հայաստանի ժողովրդավարական բարեփոխումներին՝ Եվրոպայի խորհրդի Հայաստանի համար 2023-2026 թվականների գործողությունների ծրագրի միջոցով։ Ալեն Բերսեն ողջունեց ՀՀ կառավարության համագործակցությունը Եվրոպայի խորհրդի հիմնական հաստատությունների հետ և ներպետական շրջանակները եվրոպական չափանիշներին համապատասխանեցնելու կայուն առաջընթացը։
Նա մատնանշեց Վենետիկի հանձնաժողովի հետ Հայաստանի համագործակցությունը սահմանադրական բարեփոխումների, Մարդու իրավունքների եվրոպական դատարանի որոշումների կատարման ոլորտներում, ինչպես նաև Հայաստանի կողմից Մարդու իրավունքների և կենսաբժշկության մասին կոնվենցիայի և Մահապատժի վերացման մասին արձանագրության վավերացումը։
Այցելությունը նշանավորեց Հայաստանի ժողովրդավարական բարեփոխումները՝ որպես Եվրոպայի համար Նոր ժողովրդավարական պակտի ավելի լայն տեսլականի մաս: 46 պետություններից բաղկացած Եվրոպայում համախմբված գործողությունները կարևոր են, քանի որ այսօր ոչ միայն սահմանները, այլև ինստիտուտները, հիմնարար ազատություններն ու արժեքները նույնպես վտանգված են: Հայաստանը ցույց է տալիս, թե ինչպես ազգային ջանքերը կարող են ամրապնդել մեր ընդհանուր ժողովրդավարության հիմնասյունը, քանի դեռ ուշ չէ:
Աջակցություն Ղարաբաղից փախստականներին
Գլխավոր քարտուղար Ալեն Բերսեն ընդգծեց 2.8 միլիոն եվրո կազմող արձագանքման փաթեթը, որը աջակցում է Հայաստանին՝ Ղարաբաղից փախստականների հոսքի ճգնաժամին արձագանքելու համար։ Նախաձեռնության նպատակն է ապահովել փախստականների պաշտպանությունը, ինչպես նաև փախստականներին ընդունող համայնքների դիմադրողականության ամրապնդումը։
«Մենք աշխատում ենք երկու մակարդակում՝ փախստականների իրավունքների պաշտպանություն, հոգեկան առողջության կարիքների բավարարում, առողջապահության ոլորտի տեղահանված մասնագետների ինտեգրում հայկական համակարգում և փախստականներին ընդունող համայնքների դիմադրողականության ամրապնդում», – ասաց նա։
Եվրոպական իրավական տարածքում Հայաստանի դերի ընդլայնում
Գլխավոր քարտուղարը խրախուսեց Հայաստանին դիտարկել ներկայիս մարտահրավերները հասցեագրող Եվրոպայի խորհրդի նոր կոնվենցիաներին միանալը, այդ թվում՝ կիբեռհանցագործության մեջ էլեկտրոնային ապացույցների մասին, փաստաբանների մասնագիտության պաշտպանության մասին, մշակութային արժեքների հետ կապված հանցագործությունների մասին, արհեստական բանականության և մարդու իրավունքների պաշտպանության մասին կոնվենցիաները։
Երկխոսություն հաջորդ սերնդի հետ
Երևանի պետական համալսարանում բաց դասախոսության ժամանակ Ալեն Բերսեն ուսանողների հետ խոսեց տարածաշրջանային անվտանգության, ժողովրդավարական դիմադրողականության և եվրոպական արժեքների պահպանման գործում երիտասարդության ներգրավվածության կարևորության մասին։
Եվրոպայի խորհուրդ
