«Խորհրդից իմ դուրս գալու ամենակարեւոր նշանակություն ունեցող հանգամանքը եղել է խորհրդի անդամներից մեկի կողմից պետնախարարի պաշտոնի զբաղեցումը: Առաջարկ է եղել, խորհրդի անդամն ընդունել է, բայց նախօրոք չի քննարկել խորհրդում այդ առաջարկը: Այդ առաջարկը եղել է իր անձնական որոշմամբ: Այդ որոշումից հետո միայն ներկայացրել է խորհրդում, թե ես նման որոշում եմ կայացրել»,-«Հենարան» մամուլի ակումբում նշեց «Վերածնվող Արցախ» ՀԿ նախագահ Անաստաս Իսրայելյանը՝ պարզաբանելով իր հեռանալը Արցախցիների իրավունքների պաշտպանության խորհրդից:
Ինչ վերաբերվում է խորհրդի անդամներից մեկի պաշտոն ստանալուն, խոսքը Արցախցիների իրավունքների պաշտպանության խորհրդի անդամ Նժդեհ Իսկանդարյանի մասին է, որին Արցախի նախագահ Սամվել Շահրամանյանը նախագահական լիազորությունների ավարտից մեկ օր առաջ նշանակել է Արցախի Հանրապետության պետնախարար:
«Իմ կողմից եղել է արձագանք, որ դա ճիշտ չեմ համարում: Խնդիր չէի տեսնի, եթե ներկայացուցիչը խորհրդի կազմում չլիներ, այլ ուրիշ ոլորտում լիներ: Բայց խորհրդի սկզբունքային պայմանավորվածությունը լրիվ ուրիշ ձեւաչափով է եղել: Այս սկզբունքային պայմանավորվածության հիման վրա եմ ես տվել իմ համաձայնությունը լինել խորհրդի կազմում՝ հաշվի առնելով, որ Արցախից ես պայքարելով ժողովրդի հետ միասին եկել եմ այստեղ ու շարունակել եմ իմ պայքարը՝ հանուն մեր արցախահայության, մեր այսօրվա իրավիճակում հայտնված լինելու հետեւանքները հաղթահարելու:
Ես այսպես եմ արձագանքել՝ եթե որոշում եք կայացրել պաշտոն ընդունելու համար, իմ առաջարկն է՝ խորհրդից դուրս գաք, որպեսզի խորհուրդը պահպանի իր ինքնուրույնությունը: Ի սկզբանե որոշված է եղել, որ խորհուրդը պետք է ինքնուրույն լինի, կապ չունենա ոչ մի ուժի, ոչ մի պաշտոնյայի հետ, որպեսզի կայացրած որոշումները չլինեն ճնշման արդյունքում, նաեւ որոշել ենք, որ չպետք է շեղվենք մեր որդեգրած սկզբունքներից»,-ասաց Անաստաս Իսրայելյանը:
Կարդացեք նաև
Նաեւ հավելեց, որ իր տեղեկություններով եւս 5 հոգի դուրս է եկել խորհրդից: Նա տեղեկացրեց, որ խորհուրդը բաղկացած է 37 հոգուց, բայց նիստերին մշտապես մասնակցում են 9-10 հոգի:
Գոհար ՀԱԿՈԲՅԱՆ
