«Ձեր առաջարկած ծրագիրը ստեղ ապրելու, ինտեգրվելու մասին է, կառավարության առաջարկած ծրագիրն արտագաղթի ծրագիր է»,-անդրադառնալով Հայ Ազգային Կոնգրեսի դահլիճում «Արցախահայության սոցիալ-տնտեսական ինտեգրման կարևորությունը և առկա խնդիրները թեմայով» բանախոսության ժամանակ «Ապրելու երկիր» կուսակցության համահիմնադիր Մեսրոպ Առաքելյանի ներկայացրած ծրագրին՝ այսպիսի կարծիք հայտնեց «Վերածնվող Արցախ» ՀԿ նախագահ Անաստաս Իսրայելյանը։
Նշենք, որ նա դուրս է եկել Արցախցիների իրավունքների պաշտպանության խորհրդից։
Անաստաս Իսրայելյանն ասաց՝ կառավարության ծրագրի հետ կապված տասնյակ կետեր են առաջարկել, բայց կառավարությունը դրանք չի ընդունում․ «Կստացվի՝ իրենք իրենց հակասում են։ Արցախի հարցը փակել են, ժողովրդի հարցն էլ ուզում են փակել։ Այս բոլոր ծրագրերի մասնակցելով, տարբեր տեղեր լինելով, այս ծրագրի իրականացումը տեսնում եմ միայն իշխանափոխությամբ»։
Մեսրոպ Առաքելյանն արձագանքեց․ «Ինչպես Արցախ վերադարձի հարցը մեկ-երկու տարվա խնդիր չէ, այնպես էլ իշխանության փոփոխությունը մեկ-երկու շաբաթվա գործ չէ։ Բայց մեկ-երկու շաբաթ էլ արցախցիներն ունեն սոցիալական խնդիրներ։ Շատ կարճաժամկետ հատվածում, եթե խոսում ենք, որ այս ծրագիրը գոնե չդադարեցվի, ոնց անենք, ճնշենք, որ երկարացնեն, իսկ ծրագիր լուծողն այսօրվա կառավարությունը չէ։ Եթե այդ մարդկանց համար արցախցիները նպատակ չեն, կարծում եմ՝ առնվազն միամտություն է ՀՀ գործող իշխանության և Արցախ բառի հետ կապված որևէ երևույթի, գործընթացի միջև կապ տեսնելը։ Ինքնախաբեություն է մտածելը՝ գործող իշխանություններն Արցախի, արցախցիների հետ կապված որևէ խնդիր կարող են լուծել։ Միակ բանը, որ իրենցից կարող ենք ակնկալել նոր խնդիրներ գոնե չստեղծեն»։
Կարդացեք նաև
Տաթև ՀԱՐՈՒԹՅՈՒՆՅԱՆ
