«Մենք անընդհատ կապի մեջ ենք Իրանի մեր ընկերների, մեր կառույցի ներկայացուցիչների հետ, պարբերաբար տեղեկություններ ստանում ենք։ Երեկ ռմբակոծության հետևանքով վնասվել էր «Ալիք» օրաթերթի շենքը։ Վստահեցնում եմ, որ մեծ խուճապ կամ արտագաղթի տրամադրություն առնվազն այս պահին չկա»,- ՀՅԴ «Սիմոն Վրացյան» կենտրոնում տեղի ունեցած մամուլի ասուլիսի ժամանակ հայտարարեց ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը։
Միևնույն ժամանակ փաստեց՝ բնականաբար, երկիրը գտնվում է լայնածավալ պատերազմի մեջ, ունենք մեծ թվով հայրենակիցներ, ազգային կառույցներ, և կա շատ մեծ մտահոգություն․ «Կա ոչ միայն Իրանում գտնվող մեր հայրենակիցների համար մտահոգություն, այլև նրա համար, որ մեր բարեկամ երկրում տեղի են ունենում լայնածավալ ռազմական գործողություններ։ Այս իմաստով կա մեծ մտահոգություն ՀՀ անվտանգության իմաստով»։
Կարդացեք նաև
Ըստ Իշխան Սաղաթելյանի՝ այս իրավիճակից կարող է օգտվել Ադրբեջանը․ «Տարբեր վերլուծություններով կանխատեսվում էր այն, ինչ տեղի ունենում է։ Չգիտեմ՝ արդյոք այն աշխատանքը, որ անհրաժեշտ էր մեր սահմանների պաշտպանության համար՝ այս վտանգները նկատի ունենալով, այս իշխանությունները ձեռնարկե՞լ են և դրա ուղղությամբ համապատասխան աշխատանք արե՞լ են։ Այդ վտանգն առնվազն Սյունիքի մասով կամ Նախիջևանի ուղղությամբ կա»։
Հարցին՝ մտահոգություն ունեք, որ կարող է Ադրբեջանն օգտագործել այս իրավիճակը, Իշխան Սաղաթելյանն այսպես արձագանքեց․ «Այդ մտահոգությունն անշուշտ կա։ Մեծ մտահոգություն կա․ մեր բարեկամ ու դաշնակից Իրանը հնարավոր է ներքաշվի խոշոր կոնֆլիկտի մեջ, և դա ունի իր սպառնալիքները ՀՀ-ի հետ կապված, ինչը կբերի տարածաշրջանային անկայունության, իսկ դրանից չենք բացառում, որ կփորձի օգտվել Ադրբեջանը ՀՀ-ի նկատմամբ տարբեր պատրվակներով նոր ագրեսիա իրականացնելու համար»։
Տաթև ՀԱՐՈՒԹՅՈՒՆՅԱՆ
