«Դուք ներկայացնում եք, որ տնտեսական աճը ՀՆԱ-ի հետ կապված մի կողմից 5,9 տոկոս է, մյուս կողմից 23,5 տոկոս՝ ՀՆԱ-հարկեր հարաբերակցություն։ Եվ դա հիմնավորում եք այն հանգամանքով, որ նվազել է ՀՆԱ- հարկեր հարաբերակցությունը, որ հարկային տեռոր չի կիրառվել։ Շատ լավ է, հարկային տեռոր չի կիրառվել 2024-ին, իսկ 2023-ին հարկային տեռոր կիրառվե՞լ է, թե՞ ոչ մասնավորապես ավտոներկրողների բնագավառում»,-խորհրդարանում դիմելով ՀՀ Ֆինանսների նախարար Վահե Հովհաննիսյանին՝ հարցրեց պատգամավոր Հովիկ Աղազարյանը։
Նա հարցրեց՝ բա մի հատ անալիզ անո՞ւմ եք, թե ոնց եղավ, որ այդ ճյուղը դուրս մղվեց տնտեսությունից, որի պատճառով և′ 188 միլիարդ դրամ չկատարվեց պետբյուջեի եկամուտների մասով, և′ ՀՆԱ-հարկեր հարաբերակցությունը 24 տոկոսից իջավ 23,5 տոկոս․ «Ոչ թե իրականում այդ պատճառով է ՀՆԱ-հարկեր հարաբերակցությունը իջել, այլ 5,9 տոկոսն է ուռճացված»։
Կարդացեք նաև
Նախարարն արձագանքեց․ «Ես ասում էի՝ մենք հարկային տեռոր չենք արել 2023-ին, 2024-ին էլ հարկային տեռոր չենք արել։ Ինչ վերաբերում է մեքենաների ներմուծման նվազմանը, այդ նվազման պատճառը ոչ թե որևէ հարկային փոփոխությունն է կամ վարչարարության փոփոխությունը, այլ ՌԴ-ում ուտիլիզացիոն վճարի ներմուծումը։ Մեքենաների ներմուծմամբ պայմանավորված՝ հարկերի՝ ոչ պլանավորված չափով աճը ամբողջ պատճառը չէ 188 միլիարդի, այլ դրա պատճառն այն է, որ մեր տնտեսության մեջ աճել են այնպիսի ոլորտներ, որոնք ավելի ցածր հարկ են վճարում»։
Տաթև ՀԱՐՈՒԹՅՈՒՆՅԱՆ
