«Այս պահին Թուրքիայից դեպի Ադրբեջան բեռների հսկայական տեղափոխում է իրականացվում: Իրանի՝ թուլացումն ակնհայտ դառնալու դեպքում մենք գործ ենք ունենալու մեր սահմանների վրա հարձակման, այսպես կոչված Զանգեզուրի միջանցքը բացելու եւ Ադրբեջանի կողմից Իրանի դեմ հյուսիսից հարձակման գործընթացին, նաեւ Թուրքիայից համապատասխանաբար դեպի Ատրպատական գործողությունների իրականացմանը, Ատրպատականի հատվածում ազերիների շրջանում բուն դրած գործակալական ցանցի միջոցով ընդվզումներով անջատողական պրոցեսների իրականացմանը»,-«Հայելի» ակումբում կայացած ասուլիսում նշեց արտակարգ եւ լիազոր դեսպան Ձյունիկ Աղաջանյանը:
«Նաեւ դրանով է պայմանավորված մեր իշխանության ղեկին նստած անձի այցը Թուրքիա՝ ստանալու համապատասխան հրահանգները եւ ինչ-ինչ խոստումներ, որ մեր զինվորականությունը համարժեք պատասխան չի տա, ինչը տեսանք թե Արցախյան 44-օրյա պատերազմի, թե Ջերմուկի դեպքերի ժամանակ: Այսինքն՝ կազմակերպված պարտության դիմաց իրենց փոխարենը բլիթներ տալու խոստումներ կլինեն՝ սահման բացելու կամ այլնի տեսքով»,-հավելեց Ձյունիկ Աղաջանյանը:
Նշեց, որ այս պահին Իրանը դեռ կարողանում է հակազդել այդ ծրագրի իրականացմանը, հատկապես, որ Թրամփը ցանկություն չունի ձախողվածների շարքում հանգրվանելու, մանավանդ սեպտեմբերին բյուջեի քննարկումներ ունի եւ այլ խնդիրներ՝ ԱՄՆ Կոնգրեսում:
Ասուլիսի ժամանակ Ձյունիկ Աղաջանյանը Վեհափառ Հայրապետին, առանձին հոգեւորականներին եւ Հայոց եկեղեցին թիրախավորելուն էլ անդրադարձավ: «Նպատակը հանրությունը պառակտելն է, ազգային շահեր հետապնդող միակ կառույցի թուլացումն ու ջլատումն է, որը կարող է ազգային դիմադրողականության դրսեւորման առաջնորդություն ստանձնել: Այս պարագայում ես ենթադրում եմ, որ նա փորձում է հարմար պատրվակ ու առիթ ստեղծել ներհանրային բախումների համար, որի պարագայում էլ իրավունք կվերապահի զորք կիրառելու, սահմաններից զորքը բերելու դեպի մայրաքաղաք, դրանով իսկ թուլացնելով սահմանները եւ փաստացիորեն կատարելով թուրքական պահանջները՝ հեշտությամբ հանձնելու համապատասխան տարածքները»,-ընդգծեց Ձյունիկ Աղաջանյանը:
Կարդացեք նաև
Գոհար ՀԱԿՈԲՅԱՆ
