«Կենտրոնական բանկի խորհրդի նիստում որոշվեց անփոփոխ թողնել վերաֆինանսավորման տոկոսադրույքը՝ սահմանելով 6,75%: 2025թ երկրորդ եռամսյակի ընթացքում 12-ամսյա գնաճն արագացել է՝ մայիսին կազմելով 4,3 %: Միաժամանակ 12-ամսյա բնականոն գնաճը եւս ավելացել է՝ կազմելով 2,8%» ,- ասուլիսում նշեց ԿԲ նախագահ Մարտին Գալստյանը:
Նրա խոսքով. «2025թ երկրորդ եռամսյակում համաշխարհային եւ Հայաստանի հիմնական գործընկեր երկրներում պահանջարկի հետագա դանդաղման, իսկ ԱՄՆ-ում՝ զուգահեռաբար նաեւ գնաճի արագացման ռիսկերն ավելացել են: ԱՄՆ տնտեսական, հատկապես առեւտրային քաղաքականության եւ դրա մակրոտնտեսական ազդեցությունների շուրջ բարձր անորոշությունը պահպանվում է: Միջազգային առեւտրային հարաբերություններում՝ լարվածությամբ, աշխարհաքաղաքական հակամարտությունների, հատկապես Մերձավոր Արեւելքում իրավիճակի կտրուկ սրմամբ պայմանավորված՝ առաջարկի եւ մատակարարման շղթաների հնարավոր խաթարման ռիսկերն էապես աճել են;
Բարձր են միջնաժամկետում ԱՄՆ-ի հարկաբյուջետային քաղաքականության կողմից ամբողջական պահանջարկի խթանման չափի, դրանից ածանցվող պարտքի մեծացման եւ երկարաժամկետ տոկոսադրույքների աճի չափի շուրջ անորոշությունները»:
Մարտին Գալստյանը նշեց, որ այս համատեքստում, հաշվի առնելով գործընկեր երկրներում աշխատաշուկայի՝ դեռևս պահպանվող խիստ պայմանները եւ բարձր գնաճային միջավայրը, հավանական է, որ առաջատար երկրների կենտրոնական բանկերն առաջիկայում հիմնականում պահպանեն կամ թուլացնեն դրամավարկային խիստ պայմանները դանդաղ տեմպերով:
Կարդացեք նաև
«2025թ երկրորդ եռամսյակում ՀՀ տնտեսական ակտիվությունը Հայաստանում դանդաղել է՝ մեծապես կրելով որոշ կարճաժամկետ, ոչ կառուցվածքային աճի գործոնների աստիճանական չեզոքացման ազդեցությունը: Ակտիվության աճին շարունակել են զգալիորեն նպաստել շինարարության եւ ծառայությունների ճյուղերի բարձր աճը»,-հավելեց նա:
ԿԲ նախագահը նշեց, որ ծառայությունների նկատմամբ արտաքին պահանջարկը շարունակում է նվազել, իսկ ընդհանուր պահանջարկի ազդեցությունը գնաճի վրա գնահատվում է չեզոք: Նա փաստեց, որ աշխատաշուկայի պայմանները որոշակիորեն թուլացել են՝ արտահայտվելով աշխատավարձերի, կոշտ գներով բնութագրվող ծառայությունների գնաճի եւ գնաճային սպասումների աստիճանական կայունացմամբ: Նշեց, որ միաժամանակ հարկաբյուջետային քաղաքականության կողմից միջնաժամկետ հորիզոնում առկա են առավելապես գնաճային ռիսկեր: Ի թիվս այլնի, նա անդրադարձավ նաեւ ԿԲ խորհրդի դիտարկած մի քանի սցենարների, որոնք հնարավոր են բարձր անորոշության պայմաններում:
Մանրամասն՝ տեսանյութում
Գոհար ՀԱԿՈԲՅԱՆ
