ՀԱԵ Ռուսաստանի և Նոր Նախիջևանի թեմը հայտարարություն է տարածել Սամվել Կարապետյանի շուրջ ծավալված իրադարձությունների վերաբերյալ
Ազգային սրբավայրերի պաշտպանությունը հանցագործությո՞ւն է
Միավորված Հայ Առաքելական եկեղեցու կողմից մենք՝ Ռուսաստանի հայերս, Ռուսաստանի և Նոր Նախիջևանի թեմի զավակներս, վրդովմունքով տեղեկացանք հայկական իշխանությունների կողմից վրեժխնդրության նոր ակտի մասին։
Երբվանի՞ց է ազգային սրբավայրերի նկատմամբ հավատարմության դրսևորումը և Հայ Առաքելական եկեղեցու գործունեությանն աջակցությունը համարվում հանցագործություն։ Այս անգամ նման մեղադրանքն առնչվեց ճանաչված ազգային գործիչ Սամվել Սարգսի Կարապետյանին, որը, որպես ճշմարիտ հավատացյալ, որդիական նվիրվածություն հայտնեց Հայ Եկեղեցուն և Ամենայն հայոց կաթողիկոս Գարեգին Երկրորդին։
Ցավալի և վիրավորական է, որ իշխանություններն արշավ են սկսել Կարապետյանի դեմ՝ մարդու, որը ոչինչ չի խնայել ազգի և երկրի պահպանման համար և իր բարի, հայրենասիրական գործերով վաստակել է ազգային բարերարի համբավ, մարդու, որին այլ կերպ, քան ազգային արժեք չի կարելի անվանել։
Կարդացեք նաև
Հանրապետության կազմավորման առաջին օրերից Կարապետյանը ծառայել է նրա պատվին և բարգավաճմանը, եղել է Հայաստանի առաջընթացի դրոշակակիրներից մեկը և ռուս-հայ հարաբերությունների պաշտպան։
Աշխարհի բազմաթիվ հայտնի մարդկանց արձագանքը զարգացող իրադարձություններին ցույց է տալիս, որ վարչապետը և իշխող կուսակցության ներկայացուցիչները, իրենց օրենքից վեր դասելով, բիրտ ուժ են կիրառում վախի մթնոլորտ ստեղծելու համար, փորձում են ճնշել ազգային և հոգևոր արժեքների պաշտպանների ձայները, ամեն քայլափոխի նվաստացնելով երկիրը և նրա քաղաքացիներին, հասարակությանը տանելով պառակտման։
Մենք խստորեն դատապարտում ենք նման վարքագիծը, որը վարկաբեկում է հայ ազգը՝ որպես հին մշակույթի կրողի։
Մեր ժողովուրդը, չնայած խարդավանքներին, հավատարիմ է իր արմատներին և բարձր ավանդույթներին, անսասան է իր նախնիների ժառանգությանը և Սուրբ Եկեղեցուն հավատարմություն ցուցաբերելու իր կամքում։
Հայաստանի իշխանություններից պահանջում ենք դադարեցնել կամայականությունները և կատարել իրենց անմիջական պարտականությունները՝ պահպանելու օրենքի գերակայությունը և ազգային միասնությունը։
Ներկայիս բարդ իրականությունում իշխանությունները նախևառաջ պետք է գործուն անվտանգության միջոցներ ձեռնարկեն ճնշելու տարածաշրջանում աշխարհաքաղաքական սպառնալիքները, որոնք կարող են ճակատագրական դառնալ հայկական պետության և մեր ժողովրդի համար։
