«Ես Մայր Աթոռին պատերազմ չեմ հայտարարել, պատերազմ հայտարարել են այն մարդիկ, ովքեր խախտում են Հայ Առաքելական եկեղեցու կանոնակարգը, խախտում են կուսակրոնության ուխտագիրը, խախտում են մեր ավանդույթները։ Եվ իմ խնդիրը՝ որպես Հայ Առաքելական եկեղեցու հավատավոր հոտի հավատարիմ ներկայացուցիչ, Եկեղեցին վերադարձնելն է հոգեւոր արժեքներին ու հոգեւոր արմատներին»,- այսօր խորհրդարանում լրագրողների հետ ճեպազրույցում ասաց Նիկոլ Փաշինյանը։
Լրագրողները հարց տվեցին Փաշինյանին այն մասին, որ աշխարհաքաղաքական իրավիճակը լարված է, իսկ Նիկոլ Փաշինյանը զբաղված է Եկեղեցու դեմ արշավ ծավալելով ու սոցիալական ցանցերում գրառումներ անելով։ Նիկոլ Փաշինյանն ասաց․ «Ինչ վերաբերում է աշխարհաքաղաքականությանը, այո, տարածաշրջանում իրադրությունը շատ բարդ է։ Եվ եթե դուք նկատել էիք, ես այդ իրադարձությունների մեկնարկից ի վեր ներքաղաքական հարցերով առանձնապես չէի արտահայտվում։ Բայց դա չի նշանակում, որ մյուսներն այդ պասիվությունը պետք է օգտագործեին լկտի հարձակումներ անելու համար։ Լկտի հարձակումները համարժեք պատասխան կստանան»։
Հարցին, թե ի՞նչ հիմք ունեն՝ մեղադրելու Վեհափառին, որ խախտել է կուսակրոնության ուխտը, Նիկոլ Փաշինյանը պատասխանեց․ «Ես կարծում եմ, որ ունեմ ապացույցներ։ Եթե ես խոսում եմ, ուրեմն ունեմ ապացույցներ։ Դուք չե՞ք նկատել, որ իրենք ընդհանրապես չեն վիճարկում իմ հայտարարությունները։ Ես առաջարկել էի, եթե իրենք վիճարկում են, կարող են դատի տալ, եւ այդ ապացույցները կներկայացվեն։ Կամ այլ ձեւաչափով այդ ապացույցները կներկայացվեն։ Իմ դիրքորոշումներն ամբողջությամբ հիմնված են Հայ Առաքելական եկեղեցու իրավական կանոնների վրա»։
Անդրադառնալով հարցին, թե Եկեղեցու դեմ այս արշավը կարող է հանգեցնել քաղաքացիական պատերազմի, բացառո՞ւմ է նման սցենարը, նա պատասխանեց․ «Ես անհեթեթ եմ համարում բախումների մասին խոսակցությունը։ Դա կատարյալ անհեթեթություն եմ համարում։ Մենք 2018 թվականին Հայաստանում հեղափոխություն ենք իրականացրել, եւ ըստ էության բախումներ չեն եղել։ Մենք բացառապես հոգեւոր խնդիր ենք առաջ քաշում, եւ այդ հոգեւոր խնդիրն իրականացնելը կարող է տեղի ունենալ միայն հոգեւոր, քրիստոնեավայել, քրիստոնեական սիրո վրա հիմնված գործողություններով ու քայլերով։ Հայ Առաքելական եկեղեցու հավատավոր հոտն ինքը կմերժի»։
Կարդացեք նաև
Փաշինյանն իր հետ բերել էր գրքեր՝ Մայր Աթոռ Սուրբ Էջմիածնի կանոնագիրքը, ասաց, որ ապացույց է բերել։ «Ահա այս գրքերի մեջ սահմանված կանոնները, այս գրքի մեջ կանոնները ձեւակերպվել են 351 թվականից՝ Աշտիշատի ժողովից սկսած, որտեղ հստակ ասվում է, որ կուսակրոնությունը խախտած եպիսկոպոսը կարգալույծ է արվում։ Նրանք չենք կարող ընդհանրապես խորանին մոտենալ, չեն կարող հաղորդակից լինել Հայ Առաքելական եկեղեցու սրբություններին։ Եվ դա ոչ թե ես եմ ասում, դա սահմանված է մեր նախնիների սուրբ ավանդով, պատգամով եւ կանոններով»,- նշեց նա։
Ռոզա ՀՈՎՀԱՆՆԻՍՅԱՆ
