«Տաշիր» խմբի ընկերությունների սեփականատեր, ռուսաստանաբնակ հայ գործարար, բարերար Սամվել Կարապետյանին մեղադրանք է առաջադրվել՝ իշխանությունը յուրացնելու հրապարակային կոչերի համար։ Հիշեցնենք, նա հանդես էր եկել ի պաշտպանություն Եկեղեցու, ինչից հետո Նիկոլ Փաշինյանը նրա դեմ գրառումներ սկսեց անել եւ կոնկրետ գործողություններ ձեռնարկվեցին։
Դատարանին միջնորդություն է ներկայացվել՝ Սամվել Կարապետյանին կալանավորելու համար․ այս մասին այսօր ՀՀ քննչական կոմիտեի մոտ, լրագրողների հետ զրույցում ասաց Սամվել Կարապետյանի պաշտպանական թիմի անդամ Արմեն Ֆերոյանը։
Սամվել Կարապետյանը չի ընդունում իրեն առաջադրված մեղադրանքը։
Սամվել եւ Կարեն Կարապետյանի աջակիցներն այսօր հավաքված էին Քննչական կոմիտեի մոտ այն ընթացքում, երբ Սամվել Կարապետյանը հարցաքննվում էր։
Կարդացեք նաև
«Մեղադրանքը ապօրինի է, իրականության հետ որեւէ աղերս չունի, քանի որ Սամվել Կարապետյանը նման կոչեր չի հնչեցրել։ Յուրաքանչյուր բանական մարդ կարող է տեսագրությունը լսել եւ համոզվել։ Նրա հայտարարությունում իշխանությունը յուրացնելու կոչեր չկան»,-հայտարարեց պաշտպանը։
Գործարարին մեղադրանքն առաջադրվել է ՀՀ քրեական օրենսգրքի 422-րդ հոդվածի 2-րդ մասով․ «Նշված հոդվածը պատիժ է նախատեսում այլընտրանքային ձեւով՝ տուգանք պատժատեսակ, նաեւ հանրային աշխատանքներ։ Նման հոդվածով անձին կալանքի ներկայացնելը վկայում է այն մասին, որ ամբողջ գործընթացն ապօրինի է»։
Փաստաբանական խմբի անդամ Ռուբեն Հակոբյանն էլ տեղեկացրեց, որ երեկ Կարապետյանների տան մոտից ավելի քան 50 անձ բերման է ենթարկվել, նրանց սահմանված ժամկետից շատ են պահել անազատության մեջ, անհամաչափ հարկադրանք է կիրառվել, խախտվել է բնակարանի անձեռնմխելիության հետեւանքը․ «Ընթացքում դուք էլ կհամոզվեք, որ վարույթ նախաձեռնելը, և հարկադրանքի միջոց կիրառելը, մեղադրանք ներկայացնելը կրում են բացարձակ ապօրինի բնույթ։ Ինչպես Սամվել Կարապետյանը հայտարարել է վարույթային գործողությունների ժամանակ՝ աբսուրդի ժանրից է, ավել ոչինչ չեմ կարող ասել»։
Քննչական կոմիտեն դեռ պաշտոնական տեղեկություն չի տրամադրել:
Մանրամասները՝ տեսանյութում
Նելլի ԳՐԻԳՈՐՅԱՆ
