«Եկեղեցին միշտ ժողովրդի հետ է։ Սամվել Սարկիսովիչը միշտ հավատարիմ է եղել ազգային արժեքներին, ժողովրդի և պետության շահերին՝ չնայած բոլոր փորձություններին», – այսօր Երեւանի ընդհանուր իրավասության քրեական դատարանի շենքի դիմաց լրագրողներին ասաց Հայ Առաքելական Եկեղեցու (ՀԱԵ) Ռուսաստանի և Նոր Նախիջևանի թեմի առաջնորդ, Եզրաս արքեպիսկոպոս Ներսիսյանը (Ամենայն հայոց կաթողիկոս Գարեգին Բ-ի եղբայրը) :
Նա նույնպես եկել էր աջակցելու գործարար և բարերար Սամվել Կարապետյանին, որին մեղադրանք է առաջադրվել ու դատարան կալանքի խափանման միջոց ընտրելու մասին միջնորդություն է տարվել:
Պատասխանելով հարցին, թե ինչպես է գնահատում եկեղեցու վրա ճնշումը, Եզրաս արքեպիսկոպոսն ասաց. «Մենք ոչինչ չենք գնահատում կամ բնութագրում: Մենք այստեղ ենք՝ վկայելու այս արժեքները կրող մարդկանց սիրո և նվիրվածության մասին: Ես այստեղ եմ նաև հարյուր հազարավոր հայերի աջակցությունը Ռուսաստանին փոխանցելու համար: Ամբողջ հայ ազգը ճանաչում է Սամվել Սարկիսովիչին: Ցանկացած ազգ, ցանկացած երկիր պետք է ուրախ լինի նման որդի, հայրենասեր, պետականամետ գործիչ ունենալով, ով բազմաթիվ գործերով արտահայտել է իր հավատարմությունը այս արժեքներին»:
Կարդացեք նաև
Նա չպատասխանեց հարցին, թե ինչպես կավարտվի Փաշինյանի կողմից եկեղեցու դեմ հայտարարված պատերազմը:
ՀԱԵ Գուգարաց թեմի առաջնորդ, Հովնան եպիսկոպոս Հակոբյանն էլ ցնորամտություն համարեց Փաշինյանի պնդումները, թե կաթողիկոսը պետք է ազատի վեհարանը. «Խnսում եք մի մարդու մասին, որին գնահատական տալն ապաշնորհություն է… Կուսակրոնության խնդիրը դիստիպլինի հարց է, աստվածաբանական դոկտրինա չէ: Նման հարցերը լուծվում են բացառապես եկեղեցում, եկեղեցում գոյություն ունեցող կարգապահական հանձնախմբի շուրջ: Այս ընթացքում բազմաթիվ կարգալուծություններ են եղել: Բայց ամեն մերկապարանոց հարցերին չենք կարող մենք իրական պատասխանենք»:
Հարցին՝ ճնշումների տակ կաթողիկոսը հրաժարական կտա՞, Գուգարաց թեմի առաջնորդը պատասխանեց՝ բացառվում է:
Արփինե ՍԻՄՈՆՅԱՆ
Լուսանկարները՝ Սյուզի Բադոյանի ֆեյսբուքյան էջից
