«Կառավարության ներկայացուցիչները հարկ չեն համարում դուրս գալու եւ ժողովրդին պատասխանելու։ Իրենք ասելիք չունեն, իրենք մեզ չեն ծառայում, ուրեմն ճշմարտություն է այն, որ մեզ խաբել են, խաբում են»,-կառավարության շենքի մոտ հայտարարեց «Վերածնվող Արցախ» նախաձեռնության ղեկավար Անաստաս Իսրայելյանը։
Ցույցն ավարտվեց, իսկ հետագա գործողությունները կլինեն բազմահազարանոց հանրահավաքները․ «Հանրային ճնշման միջոցով կանենք եւ կստանանք արդյունքները։ Գերիները ետ պիտի վերադառնան, արցախցիները իրենց բնակարաններ պիտի վերադառնան։ Չի ստացվելու։ Արցախի հարցը չեք փակելու, մենք չենք արտագաղթելու»։
Նա կոչ արեց բոլորին՝ առանց նախապայմանների, դուրս գալ եւ կանգնել սեփական իրավունքների պաշտպանությանը։ Իսկ նրանք, ովքեր միայն խոսում են արցախահայերի խնդիրներից, Արցախի մասին, բայց գործնական քայլերում մասնակից չեն, անվանեց կեղծ։ Առաջիկա անելիքների մասին՝ կհայտարարվի։
Հիշեցնենք, այսօր կառավարության շենքի մոտ կրկին ցույցի էին հավաքվել արցախցիները՝ պահանջով՝ վերանայել կառավարության սոցիալական ծրագրերը՝ արցախցիներին տրամադրվող օգնությունները դարձնելով անժամկետ, մինչեւ մարդկանց խնդիրները լուծում ստանան։ Կառավարությունից ոչ ոք դուրս չեկավ ցուցարարների հետ հանդիպման։
Կարդացեք նաև
Ամբողջական տեսանյութը՝ այստեղ
Նելլի ԳՐԻԳՈՐՅԱՆ
