«Իմ տեղեկություններով՝ այս պահին նման հանդիպում նախատեսված չէ, բայց չեմ կարող դա բացառել»,- հարցին՝ Անկարայում հնարավո՞ր է Փաշինյան-Էրդողան-Ալիև հանդիպում, լրագրողների հետ ճեպազրույցում այսպես պատասխանեց «Քաղաքացիական պայմանագիր» խմբակցության պատգամավոր Արման Եղոյանը։
Նա նշեց՝ միջազգային հանդիպումներում որոշումները կայացվում են հենց տեղում․ «Դրանում որևէ տարօրինակ բան չեմ տեսնի, եթե նման հանդիպում լինի։ Կարծում եմ՝ այցը կարևոր է։ Կարծեմ՝ անկախությունից ի վեր առաջին երկկողմ այցն է։ Հատկապես եռացող տարածաշրջանում Թուրքիայի հետ պետք է խոսել, հասկանալ միմյանց»։
Հարցին՝ եթե եռակողմ հանդիպում լինի, ի՞նչ հարցեր են հնարավոր, որ քննարկվեն, Արման Եղոյանը պատասխանեց․ «Եթե ստացվի եռակողմ հանդիպում, բնականաբար, պիտի լինի ՀՀ-Ադրբեջան խաղաղության պայմանագրի ստորագրման հարց»։
Լրագրողների դիտարկմանը՝ փաստորեն Թուրքիան դերակատար է դառնում, Արման Եղոյանն այսպես արձագանքեց․ «Մոտ 700 տարի կլինի՝ հատկապես վերջին 500 տարին։ Խաղաղության երաշխավոր․ դրանք քաղաքական ձևակերպումներ են։ Միջազգային պայմանագրերի կատարման երաշխավորը միջազգային հանրությունն է և այն կազմակերպությունները, որոնց անդամ են կողմերը և այդ կանոնները ընդունում են։ Թուրքիայի դերակատարությունը տարածաշրջանում կա․ գյուտարար չեմ լինի»։
Կարդացեք նաև
Լրագրողները հետաքրքրվեցին՝ Թուրքիան կարո՞ղ է Ադրբեջանին բերել կառուցողական դաշտ, պատգամավորն այսպես պատասխանեց․ «Եթե Թուրքիան նման քաղաքական նպատակ ունենա, նման հնարավորություն ինքն ունի։ Այլ հարց է՝ քաղաքական կամք կունենա, թե՝ ոչ»։
Տաթև ՀԱՐՈՒԹՅՈՒՆՅԱՆ
Հ. Գ. Թուրքիայում Հայաստանի վարչապետի և Ադրբեջանի նախագահի հանդիպում նախատեսված չէ, «Ազատությանը» հայտնեց վարչապետի մամուլի խոսնակ Նազելի Բաղդասարյանը:
Լուսանկարը՝ արխիվային
