«Արդեն երկու ժամ է տեղեկություններ են հասնում մեզ, որ Հայաստանի ողջ տարածքով Սրբազան պայքարի երկու տասնյակից ավելի համակիրների, ակտիվիստների, նաեւ ՀՅԴ տարածքային գրասենյակներից մարդկանց են ձերբակալում, տներն են խուզարկում, բերման են ենթարկում»,-լրագրողների հետ զրույցում նշեց Սրբազան շարժման առաջնորդ Բագրատ արքեպիսկոպոս Գալստանյանը:
«Ենթադրում ենք, որ այս հալածանքների շղթան, որ սկսել են, պարզապես այսօր Թուրքիայում գտնվող անձի վախերի արտահայտությունն է լայն իմաստով: Այդ վախը արտահայտվում է նաեւ ոստիկանական ռեպրեսիաների, հալածանքների տեսքով»,-ասաց սրբազանը:
Նրա խոսքով, «Իրենց բնորոշումը հասարակական կարգի խաթարման վերաբերյալ լրիվ դատարկաբանություն է, եւ հասարակական կարգն առաջին հերթին խաթարում են հենց իրենք: Սա միեւնույն ժամանակ խոսում է այն մասին, որ մեզ անհասկանալի, անբացատրելի կերպով տեղի է ունեցել Թուրքիայի իր այցը, չգիտենք՝ ինչ են նախատեսել, ինչ են ծրագրել, երեւի մտածում է վերադարձին ինչ-որ բաներ տեղի կունենան, դրա համար հիմիկվանից սկսել են հալածանքներ ձեռնարկել:
Կարդացեք նաև
Բայց մեզ դրանով ոչ մի կերպ չեն վախեցնելու, ոստիկանապետին էլ եմ ասում՝ ուղիղ նայելով իր աչքերին, բոլորին են ասում, ովքեր լծված են այս գործին՝ անկախ նրանից, թե իրենք ինչ ձեւակերպումներ կտան, ինչ կասեն, ինչ չեն անի, մեզ որեւէ կերպով չեն կարող ո՛չ վախեցնել, ո՛չ հետ պահել այս պայքարից, սա մեր ուղին է , մեր ճանապարհը, ի վերջո անխուսափելիորեն պետք է տեղի ունենա մեր հաղթանակի վերջնահանգրվանը»:
Հիշեցնենք, որ ոստիկանություն են կանչել նաեւ «Որդիների կանչ» ՀԿ ներկայացուցիչ Արա Ռոստոմյանին , Արցախի պատգամավոր Դավիթ Գալստյանին, սակայն վերջինս փաստաբան Ռոման Երիցյանի խոսքով, այս պահի դրությամբ ձերբակալված չէ:
Ամբողջությամբ՝ տեսանյութում
Գոհար ՀԱԿՈԲՅԱՆ
