«Այս ապօրինություններն այսօրվա իշխանության վախերն են, և ղեկավարն էլ, որ այսօր գտնվում է Թուրքիայում երևի իր Էրդողան եղբայրն իրեն ասել է՝ ինչո՞ւ չես ձերբակալում ընդդիմադիրներին, և վախերի մեջ սկսել են այս ձերբակալությունները»,- լրագրողների հետ զրույցում ասաց ՀՀ ԱԺ «Հայաստան» խմբակցության պատգամավոր Արթուր Սարգսյանը՝ անդրադառնալով Սրբազան պայքարի, դաշնակցականների և այլ քաղաքացիների ձերբակալություններին։
Պատգամավորը նշեց՝ շատ մարդկանց տարել են անհայտ ուղղությամբ, հեռախոսային կապ չկա։
Լրագրողները հիշեցրին՝ ՆԳՆ տարածած հաղորդագրությամբ նշվում է, որ օպերատիվ տվյալներ են ստացվել հասարակական կարգի խաթարմանն ուղղված գործողությունների նախապատրաստման վերաբերյալ։
Կարդացեք նաև
Այս առիթով Արթուր Սարգսյանն ասաց․ «Վստահեցնում եմ՝ սխալ տեղեկություններ են։ Մեր պայքարը մեր հայրենիքի համար է։ Այս պայքարը չի դադարել, և հենց իրենց վախերն են։ Գիտեն՝ սրբազանի գլխավորությամբ ամենօրյա աշխատանք է գնում, որ հեռանա Նիկոլ Փաշինյանը։ Այդ վախերի արդյունքում փորձում են անել այդ ձերբակալությունները, որ վախի մթնոլորտ ստեղծեն մեր հանրության մոտ»։
Լրագրողները նշեցին՝ տեղեկություններ կան, որ իրավապահները ցանկանում են մուտք գործել նաև Բագրատ սրբազանի տուն, Արթուր Սարգսյանն այսպես արձագանքեց․ «Պատրաստ ենք, ստեղ ենք, ով ուզում է՝ գա։ Մեր պայքարը մեր հայրենիքի, արժանապատվության, եկեղեցու համար է։ Այս ձերբակալությունները չեն խոչընդոտելու մեր սրբազան պայքարին, մեր հայրենիքի համար պայքարին։ Մեր պայքարը կշարունակվի այնքան ժամանակ, մինչև այս դավաճան իշխանություններին հեռացնենք»։
Տաթև ՀԱՐՈՒԹՅՈՒՆՅԱՆ
