«Հանուն Հանրապետության» կուսակցության նախագահ Արման Բաբաջանյանի ֆեյսբուքյան գրառումը
Այս վճռորոշ պահին, երբ տարածաշրջանը կանգնած է նոր վտանգների և անկանխատեսելի զարգացումների շեմին, Հայաստանի պետականությունը պահանջում է առավելագույն զգոնություն, խոհեմություն և միակամություն։
Կոչ ենք անում բոլոր քաղաքական ուժերին, հասարակական կազմակերպություններին, մտավորականությանը, Հայ Առաքելական Սուրբ Եկեղեցուն և յուրաքանչյուր քաղաքացու՝ ամեն ինչ մի պահ դնել մի կողմ, ներքաղաքական ցանկացած տարաձայնություն հետաձգել և լցվել Հայաստանի պետականության հանդեպ խոր սիրով ու հավատարմությամբ։
Այս օրերին ներքաղաքական և արտաքին քաղաքական շահարկումները, փոխադարձ մեղադրանքներն ու ներքին պայքարը միայն թուլացնում, խարխլում են պետությունը։ Այսօր առաջնայինը պետականության ամրությունն է։
Կարդացեք նաև
Կոչ ենք անում Հայաստանի իշխանություններին լինել առաջինը, որ զսպվածության, պատասխանատվության և պետական շահը վեր դասելու օրինակը կցուցադրեն ողջ հասարակությանը։ Ցանկացած որոշում պետք է լինի բացառապես հաշվարկված, կշռադատված և ուղղված Հայաստանի անվտանգությանը, տարածքային ամբողջականությանը և միջազգային հեղինակության պաշտպանությանը։
Այսօր մեր բոլորի պարտքն է մի կողմ դնել անձնական հաշիվներն ու տարաձայնությունները և կանգնել միասնական ու անսասան՝ պետության կողքին՝ պաշտպանելով նրա հիմքերը, սահմանները և ազգային արժանապատվությունը։ Միայն այս գիտակցությամբ և կամքով մենք կկարողանանք հաղթահարել ամենածանր փորձությունները և կերտել ուժեղ, կայուն և վստահելի պետություն՝ արժանի ապագա թողնելով մեր ժողովրդին և սերունդներին։
