«Հայ հավատավոր ժողովուրդը գիտի, որ այսօր Էջմիածնի տոնն է: Դրա վառ ապացույցն է, որ վաղ առավոտից Էջմիածին մարդկանց հոսքը չէր դադարում: Էջմիածինը բազմամարդ է: Եվ ես նկատեցի, որ բոլորը աղոթում էին, երգում էին եւ Հայր Մերը բոլորը հնչեցնում էին: Շատ կարեւոր է, որ հավատը առ Աստված մեր ժողովուրդը երբեք չի կորցրել եւ չի էլ կորցնելու:
Ես ամենեւին զարմացած չեմ, որ իշխանությունը զավթած, վարչապետի աթոռին նստած անձը չբարեհաճեց շնորհավորել անգամ մեր Սուրբ Էջմիածնի տոնը: Եվ դրա փոխարեն ինքը մեծ հաճույքով շնորհավորում է մեր հարեւան երկրի հոգեւոր տոնը, ոտքերը բոբիկացնում եւ մտնում է մզկիթներ: Դեմքի արտահայտությունից էլ երեւում է, որ գնում է, կարծես, հարազատ տեղ:
Էլի եմ ասում. ինքը քրիստոնեական տոները առանձնապես չի շնորհավորում, երբեւէ իր պաշտոնավարման ընթացքում ներկա չի եղել պատարագներին, քրիստոնեական օրացույցի տոներին: Սա ապացույց է, ցուցիչ է: Բայց դրա փոխարեն ցուցադրաբար՝ բոբիկ, դեմքի երջանիկ ժպիտով մտնում է այլ կրոնների պատկանող կենտրոններ: Սա նույնպես ցուցիչ է:
Սրա համար հայ ժողովուրդը անելիք ունի: Հայ ժողովուրդը պիտի ապացուցի, որ ինքն իր հավատի մեջ անսասան է եւ որեւէ մեկը, որեւէ դրածո, իշխանությունը զավթած որեւէ մեկը չի կարող, իրավունք չունի եւ չի կարողանալու սասանել հայ ժողովրդի հավատը առ Աստված, քրիստոնեական արժեհամակարգ:
Կարդացեք նաև
Այսօրվա այս միջոցառումը դրա ապացույցն է: Եվ ինչպես նշում է Սամվել Կարապետյանը, մենք բոլորս մեր ձեւերով պատրաստ ենք պայքարել, կանգնել մեր եկեղեցու կողքին եւ սատարել մեր եկեղեցուն»,-այսօր Մայր Աթոռում Aravot.am-ի հետ զրույցում ասաց ՀՀԿ ԳՄ անդամ Մարգարիտ Եսայանը:
Աշոտ ՀԱԿՈԲՅԱՆ
