Aravot.am-ը Պոլսո հայոց պատրիարքի փոխանորդ Արամ արքեպիսկոպոս Աթեշյանից հետաքրքրվեց՝ ինչո՞ւ Հայ Առաքելական եկեղեցին չի մասնակցել Թուրքիայի հայ համայնքի հետ Փաշինյանի հանդիպմանը: Սրբազան հայրն ասաց, որ չի ցանկանում ոչ Վեհափառի, ոչ վարչապետի մասին որեւէ բան ասել:
Արամ Սրբազանին խնդրեցինք, այնուամենայնիվ, մի փոքր մեկնաբանություն անել, որովհետեւ Սեւծովյան տնտեսական համագործակցության կազմակերպությունում Հայաստանի մշտական ներկայացուցիչ Նաիրի Պետրոսյանը հանդիպման ընթացքում ասել էր, որ ոչ միայն հրավեր է ուղարկվել, այլ անձամբ խոսել է իր՝ Արամ սրբազանի ու պատրիարքական տեղապահի ավագ քահանա Թամադյանի հետ ու խնդրել մասնակցել հանդիպմանը:
Արամ արքեպիսկոպոս Աթեշյանը մեր դիտարկմանը հետեւյալ կերպ արձագանքեց. «Համայնքի անդամները մասնակցել են հյուրանոցում տեղի ունեցած հանդիպմանը, ի վերջո հայրենիքի վարչապետն է Փաշինյանը»:
Կարդացեք նաև
Այսօր համացանցում տարածվել է նաեւ Պոլսո Հայոց պատրիարք Սահակ արքեպիսկոպոս Մաշալյանի խոսքը՝ վերջին իրադարձությունների հետ կապված: Նրա ձեւակերպմամբ, եկեղեցին հաճախ հենց հայերից են պաշտպանել, օրինակ, հայերը կրակել են պատրիարքի վրա, իսկ Սուրբ Էջմիածնում հայ համայնավարները խեղդել են կաթողիկոսին, հարյուրավոր տաճարներ ու վանքեր են կործանել՝ Ստալինի աչքը մտնելու համար: Պոլսո Հայոց պատրիարքը նշել է, որ Հայոց եկեղեցին անգամ իր դեմ ելած զավակներին է գրկում:
Դառնալով մեր օրերին՝ նշել է, որ եկեղեցին դարերով ընտանիքի արժեքները, սրբության չափանիշները պահպանող ձայն ունի, բայց այս սատանայական դարի մեջ, խավարային ձայներ են թափանցել նորաձեւության անվան տակ: Պոլսո Հայոց պատրիարքը նշել է, որ պետք է համախմբվել սուրբ Էջմիածնի հովանու ներքո, նրա գահին բազմած Վեհափառ հայրապետի շուրջ:
Մանրամասն՝ տեսանյութում
Գոհար ՀԱԿՈԲՅԱՆ
