«Մեքենա չեմ վարում, չունեմ սեփական մեքենա, ծառայողական մեքենա ունեմ, բայց մինչեւ դա էլ սեփական մեքենա չեմ ունեցել»,- Երեւանի քաղաքապետարանում լրագրողների հետ զրույցում ասաց Երեւանի փոխքաղաքապետ Լեւոն Հովհաննիսյանը։ Լրագրողը հետաքրքրվել էր՝ երբ մեքենայով անցնում է քաղաքապետարանի դիմացի հատվածով, հաճո՞ւյք զգում է խցանումների մեջ ընկնելուց։ Իսկ պարբերական խցանումներն այդ հատվածում առաջանում են մայրաքաղաքում կատարված երթեւեկության փոփոխությունների արդյունքում։
Լրագրողը շարունակեց՝ երբ ծառայողական մեքենայով փոխքաղաքապետը մնում է խցանումների մեջ, նաեւ փողոցների փոսերն է ընկնում մեքենայի անիվը, այդ թվում «Վեոլիա ջրի» թողած փոսերը, ո՞ւմ եւ ի՞նչ բառերով է հիշում, «վերեւներին» ի՞նչ է ասում, փոխքաղաքապետը պատասխանեց. «Եթե խոսքը միայն լոկալ այս երթեւեկության փոփոխության մասին է, ապա կա մի հատ մեծ ծրագիր, որը միտված է հասարակական տրանսպորտին ավելի արտոնյալ երթեւեկության մասնակից սարքելուն։ Այսինքն` մեր հանրային տրանսպորտը պետք է արտոնյալ երթեւեկի Երեւան քաղաքով։ Սա նշանակում է, որ գործող երթեւեկությունները փոփոխության են ենթարկվելու, որը նպաստելու է, որպեսզի մեր հասարակական տրանսպորտը ավելի արագ կարողանա Ա կետից Բ կետը հասնել։ Այս բարեփոխումները մենք անում ենք….»։
«Գոնե «բարեփոխում» բառը մի ասեք»,- փոխքաղաքապետի խոսքին վրա բերեց լրագրողներից մեկը։
«Դե լավ, ուրեմն ես չեմ պատասխանում»,-նեղսրտեց Լեւոն Հովհաննիսյանը եւ հեռացավ՝ կիսատ թողնելով ճեպազրույցը։
Կարդացեք նաև
Նելլի ԳՐԻԳՈՐՅԱՆ
