ՀՀ էկոնոմիկայի նախարար Գևորգ Պապոյանն այսօր՝ հունիսի 25-ին հանդիպել է «Ռիդ» ՍՊԸ ներկայացուցիչների հետ՝ քննարկելու «Արագած» ներդրումային ծրագրի իրականացման ընթացքը։
Հանդիպման ընթացքում նախարար Պապոյանը մտահոգություն է հայտնել ներդրումային ծրագրի դանդաղ ընթացքի վերաբերյալ՝ ընդգծելով, որ նման մասշտաբային և ռազմավարական նախաձեռնությունները պետք է իրականացվեն անհրաժեշտ արագությամբ և բարձր արդյունավետությամբ։
Նախարարի խոսքով՝ գործընթացի ձգձգումը ոչ միայն խոչընդոտում է մարզի սոցիալ-տնտեսական առաջընթացը, այլև չի համապատասխանում կառավարության ակնկալիքներին։
Ընկերության ներկայացուցիչների խոսքով՝ ծրագրի ընթացքի դանդաղումը պայմանավորված է համայնքի հետ տարվող աշխատանքներում առկա խոչընդոտներով։
Կարդացեք նաև
Հիշեցնենք, որ «Ռիդ» ՍՊԸ-ի կողմից ներկայացված «Արագած» ծրագիրը նախատեսում է շուրջ 190 մլն ԱՄՆ դոլարին համարժեք ներդրումների իրականացում և 1000-ից ավելի աշխատատեղերի ստեղծում։
Ծրագրով նախատեսվում է հիմնել էկո-գյուղատնտեսական նոր գյուղ՝ 300 մինի ֆերմաներով և հյուրատներով, ինչպես նաև կառուցել 3 մլն խմ տարողությամբ ջրամբար, որը կծառայի մարզի ջրային կարիքների ապահովմանը՝ հավաքելով և պահեստավորելով առուների և աղբյուրների ջրերը։
Նախարարը պատրաստակամություն է հայտնել շարունակել նախարարության լիազորությունների շրջանակում տրամադրել աջակցություն՝ ներդրումային ծրագրի կյանքի կոչման գործում։
ՀՀ էկոնոմիկայի նախարարություն
