«Ինձ թվում է՝ մեր հասարակության մեջ որեւէ մեկի մոտ կասկած չի մնացել, որ եթե գործը մակագրվել է Մասիս Մելքոնյանին, ապա ելքը կանխորոշված է»։ Այսպիսի համոզմունք է հայտնել փաստաբան Հովհաննես Խուդոյանը դատարանի առջեւ լրագրողների հետ զրուցելիս՝ հավելելով, որ Քննչական կոմիտեի հրապարակած ձայնագրությունները «մոնտաժված են, չեն արտահայտում իրականությունը»։
Փաստաբանի կանխատեսմամբ՝ Բագրատ արքեպիսկոպոս Գալստանյանը եւ «Սրբազան շարժման» մյուս ձերբակալված մասնակիցները կկալանավորվեն, քանի որ «դատարանից արդարության ակնկալիք չկա՝ Մասիս Մելքոնյանից առավել եւս»։
Խուդոյանը ափսոսանք հայտնեց, որ Քննչական կոմիտեի պաշտոնատար անձինք «գնացել են այդ աստիճանի զազրելի կեղծիքների»։
Կարդացեք նաև
Փաստաբանը համոզված է՝ որեւէ անձ «հակաիրավական կամ հանցավոր արարք իրականացնելու մտադրություն չի ունեցել»։
Ըստ Հովհաննես Խուդոյանի՝ ՔՊ պատգամավորների սոցցանցային գրառումները ապացուցում են, որ Բագրատ Սրբազանի եւ իր աջակիցների քրեական հետապնդումները «նախապես պատրաստված քաղաքական օպերացիա է»։
Արսեն ԱՅՎԱԶՅԱՆ
