«Մենք քննարկել ենք այս հարցը և որպես Վեհաժողով հրապարակային հայտնել մեր կարծիքը։ Ադրբեջանի հետ կապված հարցը խճճված է։ Դուք լավ գիտեք ոչ միայն իմ անձնական կարծիքը, այլև Վեհաժողովի։ Մենք կույր չենք»,- Aravot.am-ի դիտարկմանը՝ ԵԽԽՎ-ում անընդհատ խոսվում է Ադրբեջանում մարդու իրավունքների խախտումների մասին, Ադրբեջանը քննադատվում է մարդու իրավունքների պաշտպաններին, լրագրողներին հետապնդելու, ազատազրկելու համար և հարցին՝ ինչպե՞ս է հնարավոր այդ հարցերը քննարկել առանց Բաքվում հայ ռազմագերիների պաշտպանության հարցը բարձրացնելու, քանի որ Բաքվում Ադրբեջանն իրականացնում է նրանց՝ այսպես կոչված դատավարությունները մարդու իրավունքների խախտումներով, առանց միջազգային ներկայության, լրագրողների հետ զրույցում այսպես պատասխանեց ԵԽԽՎ նախագահ Թեոդորոս Ռուսոպուլոսը։
Նա հիշեցրեց ԵԽԽՎ մոնիտորինգի հանձնաժողովի զեկույցը, որում կոչ է արվում ազատ արձակել հայ ռազմագերիներին ու ասաց․ «Բազմիցս խոսել ենք այդ թեմայի մասին։ Չեմ ուզում կրկնել այն, ինչ բազմաթիվ անգամներ ասել եմ։ Մենք բոլորս գիտենք, թե ինչու է սա կատարվել, մյուս կողմից էլ մենք կույր չենք։ Մենք ցանկանում ենք, որ քաղաքական բանտարկյալներն ազատ արձակվեն, որ պաշտպանվեն մարդու իրավունքներն ու օրենքի գերակայությունը։ Մենք աշխատում ենք այս ուղղությամբ։ Դեռ լավատեսություն հայտնել չեմ կարող, քանի որ, ցավոք, դեռ ոչ մի նոր բան չկա»։
Տաթև ՀԱՐՈՒԹՅՈՒՆՅԱՆ
