Լրագրողները Հայաստանի Հանրապետությունում Իրանի Իսլամական Հանրապետության դեսպան Մեհդի Սոբհանիից հետաքրքրվեցին՝ արդյոք որեւէ հետաքննություն անցկացվե՞լ է՝ պարզելու համար՝ Ադրբեջանի տարածքից հրթիռներ եկե՞լ են Իրանի տարածք, հատկապես որ իր նախորդ ասուլիսում դեսպանն ասել էր, որ ուսումնասիրվում է գործը:
«Այս հարցն Իրանի եւ Ադրբեջանի նախագահների հեռախոսազրույցի ժամանակ արծարծվել է: Ու հենց այդ հեռախոսազրույցի ժամանակ Ադրբեջանի նախագահը վստահեցրել է, որ իրենք թույլ չեն տա իրենց տարածքն օգտագործվի Իրանի դեմ, եւ դարձյալ նրանք մեզ տեղեկացրել են, որ նման բան թույլ չեն տա:
Իհարկե, մենք դեռեւս պաշտոնական տեղեկատվություն չունենք, որ նման բան տեղի ունեցած լինի, հետեւաբար միայն մամուլի ենթադրությունների հիման վրա չենք կարող պաշտոնական դիրքորոշում հայտնել: Իսկ Իրանի դիրքորոշումը Իրանի արտաքին գործերի նախարարության խոսնակը երեկ արտահայտել է: Մեր դիրքորոշումն այն է, ինչ հնչել է Իրանի ԱԳ նախարարության խոսնակի կողմից»,-ասաց Իրանի դեսպանը:
Դիտարկմանը, թե ադրբեջանական կողմը շատ կոշտ է արտահայտվել իր՝ ասուլիսում հնչեցրած հայտարարությունների վերաբերյալ, դեսպան Սոբհանին այսպես արձագանքեց. «Ինչպես արդեն նշեցի, մեր արտաքին գործերի նախարարության խոսնակը երեկ արձագանքել է, իսկ անհիմն պատմական ինչ-որ պնդումներ, որոնք կարող են լարվածության առիթ դառնալ եւ ինչպես նաեւ այլ երկրների տարածքային ամբողջականությունը հարցականի տակ դնել, ճիշտ բան չեն: Ինքնակոչ այդ պնդումներով հնարավոր չէ աշխարհագրական իրողությունները փոխել… Իմ կարծիքն այն է, ինչ արդեն հայտնել եմ»:
Կարդացեք նաև
Դառնալով Մեհդի Սոբhանիի՝ ասուլիսում հնչեցրած ամենաառանցքային հայտարարություններից մեկին, որը իրարանցում էր առաջացրել Ադրբեջանում, նշենք, որ դեսպանն ասել էր, թե Արեւմտյան Ադրբեջանը ԻԻՀ նահանգներից մեկի անվանումն է այն չի կարող օգտագործվել այլ աշխարհագրական տարածքի համար, հատկապես երբ այն օգտագործվում է Հայաստանի տարածքային ամբողջականության դեմ։
Իրանը համաձայն չէ «Ստամբուլի հռչակագրում» Հայաստանի նկատմամբ տարածքային պահանջներին՝ այն է «Արևմտյան Ադրբեջանի համայնքի» վերադարձին, որը ենթադրում է ՀՀ տարածքը։ «Այդ փաստաթղթի որոշ կետեր չեն ենթադրում առանձին անդամների համաձայնություն»,– լրագրողներին ասաց Մեհդի Սոբհանին։ Հիշեցնենք, որ Իրանը քվեարկել է փաստաթղթի ընդունման օգտին։
Հավելենք, որ ՀՀ-ում Իրանի դեսպանատանը սգո մատյան է բացվել՝ ի հիշատակ 12-օրյա պատերազմի զոհերի։ Ըստ Իրանի պաշտոնական աղբյուրների, Իսրայելի հարձակումների հետևանքով զոհվել է 935 մարդ, այդ թվում՝ 38 երեխա և 102 կին: Առավոտից Հայաստանում ԻԻՀ դեսպանատուն են գալիս դիվանագետներ, քաղաքական գործիչներ, փորձագետներ եւ գրառում կատարում սգո մատյանում:
Գոհար ՀԱԿՈԲՅԱՆ
Լուսանկարներում՝ «ՀայաՔվե» միավորման վարչության անդամներ Մենուա Սողոմոնյանը և Ատոմ Մխիթարյանն այցելել են Երևանում Իրանի Իսլամական Հանրապետության դեսպանություն և գրառումներ կատարել վերջին պատերազմի զոհերի հիշատակին բացված սգո մատյանում:
