«Եթե վարչապետն ասում է դա ԱԱԾ շենքում, ուրեմն կան։ Ձեզ թվում է՝ պետք է ասե՞մ անուններ կամ որևէ քաղաքական գործիչ դրա իրավունքն ունի՞։ Քաղաքական գործիչը չի կարող քրեական կամ որևէ նման մեղադրանքի մասին անուն տալով խոսել, եթե չունի դրա ապացույցները»,- լրագրողները հետաքրքրվեցին՝ ինչպես Նիկոլ Փաշինյանն է ասում, ՀՀ-ում կա՞ն այլ երկրների ազդեցության գործակալներ, այլ երկրի քաղաքացիներ, որ լուրջ գործընթացներ են անում, ո՞ւմ մասին էր խոսքը, այսպես պատասխանեց ՀՀ ԱԺ նախագահ Ալեն Սիմոնյանը։
Լրագրողները հետաքրքրվեցին՝ ինչպե՞ս կմեկնաբանեք Վեհարան ԱԱԾ-ի ներխուժումը, մի՞թե հնարավոր չէր այդ ամենը կանխել՝ հաշվի առնելով այն հանգամանքը, որ Աջապահյանը նախապես չէր ծանուցվել և կկարողանար ներկայանալ, Ալեն Սիմոնյանն արձագանքեց․ «Նախ որևէ մեկը չի ներխուժել Վեհարան․ Վեհարանի նախամուտքի մոտ են եղել, նույն այդ անձը փախել, թաքնվել էր այդտեղ։ Հիմա մեր ընդդիմադիր գործիչները եկել, դոշ են ծեծում։ ԱԱԾ-ն, տեսնելով, որ իրավիճակը կարող է լարվել, դուրս եկավ, որ ի ցույց դնի, որ նման բան անելու նպատակ չկա։ Թե՞ մեկի մոտ կասկած կա, որ ԱԱԾ-ն ցանկության դեպքում երեք-չորս հարյուր հոգի, որ մարդ լինի, չի կարող մտնել, այդտեղից մեկին դուրս հանել։ Իհարկե, կարող է»։
Ըստ նրա՝ այն, ինչ կատարվեց Վեհարանի նախասրահում, շոու էր․ «Այդ շոուներն իրենց վնաս է պատճառում, քանի որ իրենք շոու անել էլ չգիտեն»։
Կարդացեք նաև
Լրագրողների հարցին՝ ո՞նց է, որ բոլոր Ձեր կուսակիցներն ասում են՝ ահաբեկչություն է, բայց դատական վճիռ չկա, անմեղության կանխավարկած չեն խախտո՞ւմ, Ալեն Սիմոնյանն այսպես պատասխանեց․ «Որևէ մեկի՝ այդ ասածը չի վերաբերվում վճռին և չի հանդիսանում վճիռ։ Այն գնահատականները, որ տրվում են, քաղաքական գործիչների գնահատականներ են՝ հիմնված այն տվյալների վրա, որ տվել է իրավապահ մարմինը։ Քաղաքական գործիչների ելույթները և դատարանի վճիռը տարբեր բաներ են»։
Ըստ Ալեն Սիմոնյանի՝ այն խնդիրները, որ արծարծվում են՝ եկեղեցու ներքին խնդիրները չեն․ «Նման խնդիր կա, պատասխան չկա դրա հետ կապված։ Եկեղեցին արժեզրկում են այն մարդիկ, որոնք սև շորերը քաշում են գլխներին, աչքերը, ականջները փակում են հարցերի առաջ և ասում՝ եկեղեցու ներքին գործն է։ Թե ով է քեռակինը, աղջիկը, ասում են դա մեր ներքին գործն է։ Դա անձնական կյանք չէ։ Հիմա դուք, որ հարցեր եք բարձրացնում ԱԺ նախագահի կամ վարչապետի դեմ, դուք պետւթյա՞նն եք վնասում։ Ձև անենք, որ ոչ մի բան չի կատարվո՞ւմ»։
Լրագրողների դիտարկմանը՝ այնուամենայնիվ, անմեղության կանխավարկածը հաշվի չի առնվում, Ալեն Սիմոնյանը պատասխանեց․ «Երբ նման ինֆորմացիա է գալիս՝ «երկու հոգի պատի տակ գյուլլենք», դա ինչից ուզում ես կտրի, դա երկու հոգի պատի տակ գյուլլել է։ Դրա համար մենք հետևություններ ենք անում և եզրակացություններ անում այն ինֆորմացիայի հիման վրա, որն ունենք։ Այն, ինչ չունեմ, դրա մասին չեմ խոսում։ Երբ ասում են՝ ավտոբուսները պետք է վառեն, երբ այս բաները համադրում ես, գալիս ես եզրակացության։ Մարդուն բանտ տանելու, մեղավոր ճանաչելու համար գալիս է դատարանի վճռի փուլը, որը կարող է միայն դատարանը կայացնել։ Եթե հանցակազմ չլինի, որևէ մեկը բանտ չի գնա»։
Տաթև ՀԱՐՈՒԹՅՈՒՆՅԱՆ
