Այսօր Գյումրու ավագանու արտահերթ նիստի ժամանակ «Մայր Հայաստան» խմբակցության ղեկավար Կարեն Սիմոնյանը հանդես եկավ հայտարարությամբ՝ խստորեն դատապարտելով Շիրակի թեմի առաջնորդ Միքայել արքեպիսկոպոս Աջապահյանին կալանավորելու փաստը։ Նա ի նշան բողոքի՝ բոյկոտեց ՔՊ-ականների հրավիրած նիստը ու հեռացավ դահլիճից՝ հորդորելով նախ մարդ լինել, հայ, գյումրեցի և հետո նոր կուսակցական։
Վարդան Ղուկասյանն էլ հորդորախառն առաջարկով դիմեց ՔՊ խմբակցության ղեկավար Սարիկ Մինասյանի՝ ասելով․ ««Կուզենայինք, որ Սարիկն անպայման դեմ քվեարկեր Միքայել Սրբազանի բանտարկմանը, բարձրաձայներ, Գյումրիից սկսվեր։ Ազատությո՜ւն Միքայել Սրբազանին»։
Սարիկ Մինասյանն արձագանքեց․ «Որ ասում եք Սարիկը դեմ քվեարկի, այստեղ չենք քվեարկում Միքայել Աջապահյանի ազատությունը, կալանք տալու համար։ Ուրեմն ես Հայ Առաքելական Սուրբ եկեղեցու հետևորդ եմ, սուրբ մյուռոնով կնքված եմ»։
Վարդան Ղուկասյանը տեղից բացականչեց․ «Զգո՜ւյշ», որին ի պատասխան՝ Սարիկ Մինասյանը շարունակեց․ «Զգույշ եմ, իմ երկրին, պետությանը իմ գիտելիքներով միշտ ծառայել եմ։
Կարդացեք նաև
Մեր Շիրակի թեմի առաջնորդի հետ կապված՝ իրավական գործընթաց կա, բոլորս կհասկանանք եթե էդտեղ կա որևէ քաղաքական դրդապատճառ, միանշանակ ես կկանգնեմ Հայ Առաքելական Սուրբ եկեղեցու կողքին, ոչ թե անձերի, այլ իմ եկեղեցու, որտեղ ես կնքվել եմ, շուտով էլ պատրաստվում եմ իմ երեխաներին կնքելու։
Ուրեմն որևէ մեկը հանկարծ չկասկածի, որ մեր ավագանու խմբակցությունից որևէ մեկը կարող է դուրս գալ եկեղեցու դեմ, այստեղ եկեղեցու դեմ որևէ արշավ չկա, բոլորս հավատացյալներ ենք, քրիստոնյա։
Նորից եմ շեշտում, Հայ Առաքելական Սուրբ եկեղեցու հետևորդն ենք․ կա իրավական պրոցես, որի մեջ, ես գտնում եմ, պետք չէ մտնել, որովհետև հնարավոր է հետագայում այսպիսի ամպագոռգոռ խոսքերից հետո մարդիկ ամաչեն իրենց ասածների համար»։
Նունե ԱՐԵՎՇԱՏՅԱՆ
