Դավիթ Մինասյանին մեղադրանք է առաջադրվել այն բանի համար, որ տրանսպորտային միջոցներ վարելու իրավունքը վարչական տույժ նշանակելու մասին թիվ 2115234269 որոշմամբ 6 ամիս ժամկետով՝ 2022 թ. հոկտեմբերի 7-ից մինչեւ 2023 թ. ապրիլի 7-ը կասեցված լինելու եւ այդ մասին «Հայփոստ» ՓԲ ընկերության միջոցով պատշաճ կերպով ծանուցված լինելու պայմաններում, 2022 թ. փետրվարի 2-ին Երեւան-Սեւան Մ-4 ավտոճանապարհի 39-րդ կիլոմետրի հատվածում վարել է «Ֆոլքսվագեն» մակնիշի 88 PS 099 հաշվառման համարանիշի տրանսպորտային միջոցը, որը հայտնաբերվել է ՀՀ ՆԳՆ ոստիկանության պարեկային ծառայության Կոտայքի մարզի գումարտակի աշխատակիցների կողմից:
Այդ մասին կազմվել է վարչական իրավախախտման վերաբերյալ արձանագրություն: Այսինքն, մեղադրական եզրակացության համաձայն՝ Դավիթ Մինասյանը ենթադրյալ հանցանքը կատարել է տրանսպորտային միջոցներ վարելու իրավունքը կասեցված վիճակում՝ 2022 թ. փետրվարի 2-ին, մի ժամանակահատված է նշվել, երբ վերջինիս տրանսպորտային միջոցներ վարելու իրավունքը դեռեւս կասեցված չի եղել՝ համաձայն վերոնշյալ վարչական ակտի ժամանակահատվածի: Դատարանը փաստել է, որ ապացուցված չեն Դ. Մինասյանին վերագրվող փաստական հանգամանքները, ապացուցված չէ մեղադրյալի կողմից 2022 թ. փետրվարի 2-ին այդ արարքը կատարելը:
2023 թ. սեպտեմբերի 15-ի որոշմամբ Դ. Մինասյանի նկատմամբ որպես խափանման միջոց է կիրառվել բացակայելու արգելքը: Դ. Մինասյանը ՀՀ քրեական օրենսգրքի 344-րդ հոդվածի 1-ին մասով առաջադրված մեղադրանքում իրեն մեղավոր չի ճանաչել եւ հրաժարվել է ցուցմունք տալուց: Հանրային մեղադրողը հետագայում հայտարարում է, որ տեխնիկական վրիպակի արդյունքում է տարեթիվը 2023 թվականի փոխարեն 2022 թվական տպագրվել, իսկ դատարանում առկա գործում հանրային քրեական հետապնդում հարուցելու մասին որոշման մեջ մեղադրանքը նույնկերպ էր ձեւակերպված, ինչ մեղադրական եզրակացությունում:
Դատարանը գտնում է, որ մեղադրյալ Դ. Մինասյանը ՀՀ քրեական օրենսգրքի 344-րդ հոդվածի 1-ին մասով առաջադրված մեղադրանքում պետք է արդարացվի:
Կարդացեք նաև
2025 թ. հունվարի 21-ին Կոտայքի մարզի դատավոր Դիանա Ղուկյանի դատավճռով ճանաչվել եւ հռչակվել է Դ. Մինասյանի անմեղությունը՝ ՀՀ քրեական օրենսգրքի 344-րդ հոդվածի 1-ին մասով առաջադրված մեղադրանքում:
Դատախազը չի հանգստացել, բողոք է բերել, պահանջելով ամբողջությամբ բեկանել Կոտայքի մարզի ընդհանուր իրավասության դատարանի դատավճիռը, Դ. Մինասյանին մեղավոր ճանաչելով ՀՀ քրեական օրենսգրքի 344-րդ հոդվածի 1-ին մասով նախատեսված հանցագործության կատարման մեջ եւ որպես պատիժ նշանակել տուգանք ՀՀ-ում սահմանված նվազագույն աշխատավարձի 5-ապատիկի չափով:
Նկատենք, որ այդ տեխնիկական վրիպակի համար բացարձակ կապ չունի Դավիթը, հետեւաբար, անհասականալի է, դատախազը ինչու է տուգանքը փորձում Դավիթի «գրպանը գցել»:
Դավիթ Մինասյանի պաշտպան Թամարա Բաղդասարյանը երեկ տեղեկացրեց, որ այդ տեխնիկական խնդիրը որեւէ մեկը չի նկատել, եւ մեղադրանքի որոշման մեջ տարեթիվը հետուառաջ է եղել, գործը հասել է դատարան: Քննիչը իր միջնորդության մեջ` հանրային քրեական հետապնդում սկսելու, դատախազը որոշմամբ, տեխնիկական սխալ են արել: Հունիսի 23-ին Քրեական վերաքննիչ դատարանը (Լ.Հովհաննիսյան, Գ.Հովհաննիսյան, Մ. Մելքոնյան կազմով) անփոփոխ թողեց մարզի դատարանի արդարացման դատավճիռը:
Ռուզան ՄԻՆԱՍՅԱՆ
«Առավոտ» օրաթերթ
01.07.2025
