Հակակոռուպցիոն դատարանում, դատավոր Վահե Դոլմազյանի նախագահությամբ, ընթանում է ՀՀԿ փոխնախագահ Արմեն Աշոտյանի եւ մյուսների գործով դատական նիստը։
Արմեն Աշոտյանն այսօրվա նիստին ներկա չէ, քանի որ նիստի սկզբում հայտնի դարձավ, որ ոստիկանները նրան չէին ներկայացրել դատարան՝ պատճառաբանելով ռեսուրսների անբավարարությունը։
Հիշեցնենք, որ այս գործով մեղադրյալի կարգավիճակ ունեն ՀՀԿ փոխնախագահ Արմեն Աշոտյանը, ԵՊԲՀ աշխատակազմի ղեկավարի նախկին տեղակալ, «Հերացի» արհեստակցական կազմակերպության նախագահ Մարթա Սիմոնյանը, ԵՊԲՀ նախկին ռեկտոր Միքայել Նարիմանյանը, ԵՊԲՀ նախկին գլխավոր հաշվապահ Լարիսա Պարսեղյանը, ՍՊԸ տնօրեն Ռոլան Դավթյանը։ Արմեն Աշոտյանը եւ գործով մյուս ամբաստանյալները մեղադրվում են «Երևանի Մխիթար Հերացու անվան պետական բժշկական համալսարան» հիմնադրամում կատարված առերևույթ չարաշահումների գործով։ Աշոտյանը մեղադրվում է «պաշտոնեական դիրքի չարաշահման և փողերի լվացման համար, որն առաջացրել է ծանր հետևանքներ»։
Այսօրվա նիստում ԵՊԲՀ նախկին գլխավոր հաշվապահ Լարիսա Պարսեղյանի պաշտպանը հերթական միջնորդությունը ներկայացրեց՝ Պարսեղյանի նկատմամբ ընտրված խափանման միջոցը՝ պաշտոնավորման կասեցումը վերացնելու մասին։
«Իր մեղադրանքը բացառապես ձեւակերպված է քննարկվող ժամանակահատվածում հաշվապահական փաստաթղթերի ուսումնասիրությանը։ Հիմնավոր չէ դատարանի այն մտավախությունը, որ նա պետք է չաշխատի, որպեսզի հաշվապահական փաստաթղթերը նրան հասանելի չդառնան։ Եթե դատարանն այսօր մեր միջնորդությունը բավարարի եւ խափանման միջոցը վերացնի, իմ պաշտպանյալը շարունակելու է աշխատել՝ հենց այդ ժամանակահատվածից սկսած հաշվապահական փաստաթղթերի հետ առնչություն ունենալով։ Իսկ նման դեպքում իմաստազրկվում է որեւէ վտանգ առաջ քաշել կամ մտավախություն, որ ինքը կարող է այս գործով խոչընդոտ հանդիսանալ՝ ինչ-որ հաշվապահական փաստաթղթեր ոչնչացնելով։ Նախաքննությունն ավարտվել է, բոլոր ապացույցները, հաշվապահական փաստաթղթերը առգրավվել են»,- ասաց պաշտպանը։
Կարդացեք նաև
Դատարանը որոշեց բավարարել միջնորդությունը եւ վերացնել Լարիսա Պարսեղյանի նկատմամբ որպես խափանման միջոց ընտրված պաշտոնավարման կասեցումը։
Ռոզա ՀՈՎՀԱՆՆԻՍՅԱՆ
