«Ահաբեկիչ բառը մի տեսակ լուրջ չեմ ընդունում։ Յոթ տարի ինչ ասել են, իրականությանը չի համապատասխանել, դրա համար ահաբեկիչ բառն էլ ինձ համար ծիծաղելի է»,- ի աջակցություն Սամվել Կարապետյանի երթի մեկնարկից առաջ լրագրողների հետ զրույցում ասաց ԱՄՆ-ում բնակվող դերասան, բեմադրիչ Զոհրաբ Բեկ-Գասպարենցը։
Հիշեցնենք՝ այս պահին Սամվել Կարապետյանը գտնվում է «Երևան-Կենտրոն» քրեակատարողական հիմնարկում (ՀՀ ԱԱԾ շենքում գտնվող հայտնի «ԿԳԲ-ի պադվալ»)։ Վերաքննիչ դատարանն այսօր որոշում կայացրեց կալանքի տակ թողնել Սամվել Կարապետյանին: Կալանք սահմանելու առաջին ատյանի որոշումից անմիջապես հետո փաստաբանները դիմել էին վերաքննիչ, բայց դիմումը հետ էին վերցրել՝ հայտարարելով, թե չեն վստահում դատավոր Արմեն Դանիելյանին: Վերջինս, սակայն, անտեսելով այդ դիմումը, նիստ էր նշանակել ու գրավոր քննել բողոքը: Երթի մասնակիցներն այսօր երթով կշարժվեն դեպի ԱԱԾ շենք։
Ըստ Զոհրաբ Բեկ-Գասպարենցի՝ այս իշխանությունները միայն իրենց շահով են շարժվում․ «Եկեք ավելի անկեղծ լինենք․ պետք չէ ոչ սուլթանի մատանին պաչել, ոչ էլ սուլթանի ոտքը։ Եկեք լինենք ազգային և հասկանանք՝ որն է մեր շահը։ Այսօր սուլթանի մատանին հաստատ մեր շահը չէ, ոչ էլ ցարի ոտքերը»։
Կարդացեք նաև
Լրագրողների դիտարկմանը՝ ինչո՞ւ սիրված մտավորականներից շատերն այստեղ չեն, Զոհրապ Բեկ-Գասպարենցը պատասխանեց․ «Այս հրաշք մարդը, բարեգործ մարդը, երբ բոլորին օգնում էր, հիմա բոլորը լուռ են, ինչի՞ց են վախենում։ Ինձ համար արվեստագետն ու վախը կապ չունեն։ Ես սպասում եմ և վստահ եմ, որ շատ արվեստագետներ այսօր այստեղ կլինեն, որոնք ժողովրդական լեզվով ասած՝ Սամվել Կարապետյանի հացը կերել են։ Բարոյական արժեքներ կան, որ փողով չեն որոշվում»։
Տաթև ՀԱՐՈՒԹՅՈՒՆՅԱՆ
