«Մենք չգնացինք դատարանի մոտ, քանի որ բոլորին պարզ էր, թե ինչ է տեղի ունենում, պարզ էր նրանց նպատակները՝ հաշվի չառնելով, որ դա ոչինչ մեզ մոտ չի փոխի»,- ի աջակցություն Սամվել Կարապետյանի երթի մեկնարկից առաջ լրագրողների հետ զրույցում ասաց ՀԷՑ սեփականատեր, մոտ երեք շաբաթ կալանքի տակ գտնվող Սամվել Կարապետյանի եղբոր որդին՝ ՀԷՑ-ի տնօրենների խորհրդի նախագահ Նարեկ Կարապետյանը։
Հարցին՝ ինչպե՞ս եք պատկերացնում պայքարը, երբ իշխանությունների քաղաքական նպատակադրումն ակնհայտ է, Նարեկ Կարապետյանը պատասխանեց․ «Հասարակության հետ լուրջ աշխատանք է պետք, մեր հասարակությունը պետք է իմանա, որ իրեն հրամցնում են ոչ ճիշտ ինֆորմացիա, և ճիշտը իմանալով՝ ճիշտ որոշումներ կկայացնի»։
Այս պահին «Սիզոնսի» այգում «Ազատություն Սամվել Կարապետյանին» կարգախոսով պաստառներով, «Մեր ձևով» գրառմամբ գլխարկներով և շապիկներով հարյուրավոր քաղաքացիներ են։ Քիչ անց կմեկնարկի երթը դեպի ԱԱԾ շենք, որտեղ կալանավորված է Սամվել Կարապետյանը։
Կարդացեք նաև
Հարցին՝ այսօրվա հավաքին ի՞նչ ուղերձներ եք հղելու, Նարեկ Կարապետյանը պատասխանեց․ «Ընթացքում մենք կներկայացնենք։ Տեղի է ունեցել մի աննախադեպ բան, ու այդ պատճառով բոլորով ցույց պիտի տանք, որ դա աննախադեպ է ու ոչ ընդունելի, որ եթե աշխարհի ամենահնարավորություն ունեցող հայերից մեկի հետ այսպես են վարվում, բոլորի հետ էլ կարող են այսպես վարվել։ Եթե ցույց չտանք, որ մարդիկ դժգոհ են, այս մեթոդները կարող են շարունակվել։ Ճնշումը հասարակական, միջազգային պետք է զգացվի, ուղղակի կա մտավախություն, որ չնայած բոլոր կողմերի ճնշման՝ հնարավոր է ՀՀ-ում փորձեն շարունակել ապօրինությունները։ Կարծում եմ՝ հասարակական կոշտ վերաբերմունքն իր արդյունքը կտա»։
Տաթև ՀԱՐՈՒԹՅՈՒՆՅԱՆ
