«Հայրս ձիգ ու պինդ է»,- ի աջակցություն Սամվել Կարապետյանի երթի մեկնարկից առաջ լրագրողների հետ զրույցում ասաց ՀԷՑ սեփականատեր, մոտ երեք շաբաթ կալանքի տակ գտնվող Սամվել Կարապետյանի որդին՝ Սարգիս Կարապետյանը։
Այս պահին «Սիզոնսի» այգում «Ազատություն Սամվել Կարապետյանին» կարգախոսով պաստառներով, «Մեր ձևով» գրառմամբ գլխարկներով և շապիկներով հարյուրավոր քաղաքացիներ են։ Քիչ անց կմեկնարկի երթը դեպի ԱԱԾ շենք, որտեղ կալանավորված է Սամվել Կարապետյանը։
Հարցին՝ ի՞նչ ակնկալիքներ ունեք հավաքից, Սարգիս Կարապետյանը պատասխանեց՝ լավ տրամադրություն, ցույց տանք, որ բոլորս միասին ենք։
Կարդացեք նաև
Հարցին՝ այս օրերին ի՞նչ տեղեկություններ է հայտնում Ձեր հայրը, Սամվել Կարապետյանի որդին պատասխանեց․ «Շատ լավ տրամադրությամբ է։ Հանդիպել եմ, փոխանցել է, որ բոլորս դուխով լինենք, որ բոլորի տրամադրությունը լավ լինի»։
Լրագրողները խնդրեցին մեկնաբանել՝ ի՞նչ նկատի ուներ իր հայրը՝ մեր ձևով ասելով, Սարգիս Կարապետյանը պատասխանեց․ «Չգիտեմ՝ իրեն պիտի հարցնեք։ Շուտով կհարցնեք»։
Սարգիս Կարապետյանը հոր՝ քաղաքականությամբ զբաղվելու հնարավորության մասին հարցերին ի պատասխան ասաց․ «Չգիտեմ, իրեն պիտի հարցնեք։ Տեսնենք»։ Փաստելով, որ ինքն էլ է օգտագործում «մեր ձևով» կարգախոսը, խնդրեցին մեկնաբանել՝ դա ի՞նչ է նշանակում, Սամվել Կարապետյանի որդին պատասխանեց․ «Մեր ձևով»-ը ազատություն է ինձ համար, ազատության կարգախոսն է»։
Տաթև ՀԱՐՈՒԹՅՈՒՆՅԱՆ
