«Ակնհայտ հրահանգով կարված գործ է»,- «Հայաստան» խմբակցության պատգամավոր Արծվիկ Մինասյանի նկատմամբ քրեական հետապնդում հարուցելու հարցի քննարկման ժամանակ հայտարարեց «Հայաստան» խմբակցության պատգամավոր Գառնիկ Դանիելյանը։
Նա ասաց՝ չեմ զարմանա, որ մի քանի նիստ հետո քրեականացվի ընդդիմադիր լինելը․ «Այն, ինչում մեղադրում եք Արծվիկ Մինասյանին, կարող է կատարվել յուրաքանչյուր պետական պաշտոնյայի հետ։ Հազարավոր նմանատիպ գործեր կարող են լինել․․․Էս մարդը կադաստրի աշխատակից է, թաղայի՞ն է, ի՞նչ է․ նախարար մարդուն բաներ եք վերագրում, որն ընդհանրապես իր գործառույթի շրջանակներում լիազորված չէ։ Համոզված եմ, որ այս գործը շատ տխուր ավարտ է ունենալու»։
Կարդացեք նաև
Դիմելով «Քաղաքացիական պայմանագիր» խմբակցության պատգամավորներին՝ Գառնիկ Դանիելյանն ասաց․ «Դուք արդեն որերորդ անգամ ձեր գործընկերներին զրկում եք անձեռնմխելիությունից։ Գիտեք, որ հաջորդը գալու է նաև մեր մյուս գործընկերոջ հարցը՝ Արթուր Սարգսյանի հարցը։ Ուզում եմ հասկանալ՝ դուք ի՞նչ զգացումներ եք ունենում, երբ որոշում եք կայացնում ձեր գործընկերոջը տանել կալանքի։ Դուք ձեր արածից ձեզ լա՞վ եք զգում։ Խնդիրը ոչ թե առանձին վերցրած մի պատգամավորի հարց է, այլ կոնկրետ հարձակում է տեղի ունենում «Հայաստան» խմբակցության պատգամավորների վրա։ Ինչ-որ ժամանակ հետո գալու է ձեր՝ պատասխանատվություն կրելու ժամանակը, այս ապօրինի որոշումների հետ ձեզ հաշտ լինելու ժամանակը»։
Տաթև ՀԱՐՈՒԹՅՈՒՆՅԱՆ
