«Զանգվածային բռնաճնշումների պայմաններում ցանկացած ընդդիմադիր գործիչ՝ հատկապես Արծվիկ Մինասյանի նման ակտիվ գործչի պարագայում, շատերին կարող է նման ճակատագիր սպառնալ»,- «Հայաստան» խմբակցության պատգամավոր Արծվիկ Մինասյանի նկատմամբ քրեական հետապնդում հարուցելու հարցի քննարկման ժամանակ հայտարարեց «Պատիվ ունեմ» խմբակցության պատգամավոր Տիգրան Աբրահամյանը։
Ըստ նրա՝ իշխանությունը նման հետապնդումների է գնում, երբ բովանդակային դիսկուրսում տապալում է․ «Իշխանությունը գնում է քարոզչական հարձակումների, քաղաքական ընդդիմախոսների զրպարտության և վարկաբեկման կամ պարզապես ազատությունից զրկելու ճանապարհով։ Քիչ չեն դեպքերը, երբ քաղաքական հետապնդումների նպատակը լինում է որոշակի հեղինակություն ունեցող մարդկանց ոստիկանական, քննչական, նաև դատական քաշքշուկների և արհեստական ծանրության դաշտ տանելը, որտեղ կառավարությունը պետության փողով ներքաղաքական հարցեր է լուծում»։
Անդրադառնալով ՀՀ ԱԺ փոխնախագահ Հակոբ Արշակյանի ելույթին՝ Տիգրան Աբրահամյանն ասաց․ «ՔՊ որոշ պատգամավորների պատկերացումներում բանակն անընդհատ քննարկվում է մայկա, վարտիք, պոլի շոր, ելակ շրջանակներում, ինչն, իհարկե, քաղաքական առումով ցուցիչ է, բայց թեպետ հանուն արդարության նշեմ, որ Հակոբ Արշակյանն այս անգամ ստեղծագործ մոտեցում ցուցաբերեց զուգարանների մասով, որոնք գոմի հետ էր համեմատում»։
Կարդացեք նաև
«Քաղաքացիական պայմանագիր» խմբակցության պատգամավոր Վահագն Ալեքսանյանն էլ Տիգրան Աբրահամյանին արձագանքեց․ «Տիգրան Աբրահամյան ասում է՝ ՔՊ-ի պատգամավորները բանակի մայկեքից ու վարտիքներից ու մնացածից են խոսում։ Մեռա ասելով՝ եթե մենք դրանից խոսում ենք, ձեր քաղաքական ղեկավարությունը էս մայկաներն ու վարտիքները բառի ուղիղ ու փոխաբերական իմաստով կերել է, որ սենց տներ են քցել»։
Տաթև ՀԱՐՈՒԹՅՈՒՆՅԱՆ
