«Հուլիսի 1-ից պարեկային ծառայության պետի հրամանով ուժեղացված ծառայության է անցել նաեւ ջրային ստորաբաժանումը, շեշտը հիմնականում դրվել է փոքր Սեւանի առափնյա հատվածների վրա, որտեղ հանգստի սեզոնին հավաքվում է հանգստացողների մեծ մասը»,-«Արմենպրեսի» մամուլի սրահում կայացած ասուլիսում նշեց ՀՀ ՆԳՆ ոստիկանության պարեկային ծառայության Գեղարքունիքի մարզի գումարտակի ջրային պարեկների վաշտի հրամանատար, ոստիկանության մայոր Դավիթ Գալոյանը:
Դավիթ Գալոյան
Նրա խոսքով՝ ծառայությունն իրականացվում է 4 հերթափոխով՝ նավերով, սկուտերներով, իսկ հանգստյան օրերին՝ նաեւ հետիոտն ծառայություն՝ ջրային պարեկների հետ համագործակցությամբ:
ՀՀ ՆԳՆ ՓԾ Գեղարքունիքի Մարզային փրկարարական վարչության հատուկ ջրափրկարարական ջոկատի հրամանատար, ՓԾ փոխգնդապետ Արմեն Ճզմաչյանը նշեց, որ անցյալ տարի Սեւանա լճում տեղի է ունեցել ջրահեղձման 5 եւ 1 մահվան դեպք: Այս տարի, բարեբախտաբար, ջրահեղձման դեպքեր չկան, 8 հոգու հնարավոր է եղել փրկել:
Արմեն Ճզմաչյան
Արմեն Ճզմաչյանը հայտնեց, որ պատահարների հիմնական պատճառն այն է, որ քամին հաճախ քշում է խափանված լողամիջոցները դեպի լճի խորքերը, ալեկոծության ժամանակ նավակների մեջ ջուր է լցվում, եւ երբեմն խուճապային իրավիճակներում նավակները կողաշրջվում են:
Կարդացեք նաև
Ի թիվս այլնի՝ նա կոչ արեց չանտեսել լողանշանները եւ չգերագնահատել լողալու սեփական հնարավորությունները, հատկապես, որ սառը ջրի պատճառով կարող է մարդկանց մոտ ջղաձգություն առաջանալ: Ընդգծեց, որ արգելվում է մեծ քանակությամբ ալկոհոլ օգտագործած ջուրը մտնելը:
Մանրամասն՝ տեսանյութում.
Գոհար ՀԱԿՈԲՅԱՆ
