ՀՀ Գլխավոր դատախազ Աննա Վարդապետյանի՝ ընդդիմադիր «Հայաստան» խմբակցության պատգամավոր Արթուր Սարգսյանի նկատմամբ քրեական հետապնդում հարուցելու թույլտվություն ստանալու համար միջնորդության քննարկման ժամանակ խորհրդարանում կրքերը թեժացան։
ՔՊ խմբակցության պատգամավոր Վահագն Ալեքսանյանը, հայտարարությամբ հանդես գալու ու Աննա Վարդապետյանին հարց տալու ժամանակ, դիմելով «Հայաստան» խմբակցության պատգամավոր Արմենուհի Կյուրեղյանին, ասաց․ «Չեմ հասկանում՝ ինչի՞ վրա եք ծիծաղում։ Դրել, քննարկել եք ձեր խմբով՝ ոնց եք մարդկանց մեքենաների անիվները ծակելու, մի հատ էլ ստեղ, եկել նստել, ժպտում, ռեպլիկ եք թողնում»։
Դահլիճից արձագանքեց «Հայաստան» խմբակցության պատգամավոր Արթուր Սարգսյանը։ ՀՀ ԱԺ փոխնախագահ Ռուբեն Ռուբինյանը միջամտեց․ «Լռիր դու մի հատ էդտեղ, ստեղ հարցերը մենք ենք տալիս։ Սուս մնա, իրեն խոսք է տրված՝ ինքը խոսում է։ Լռիր, նստիր տեղդ, ասում եմ»։
Կարդացեք նաև
Արթուր Սարգսյանն ասաց՝ չես կարա ինձ ասես։
Ռուբեն Ռուբինյանն էլ պատասխանեց՝ կարամ ասեմ, ես եմ նիստը վարում։ Արթուր Սարգսյանը դահլիճից շարունակում էր արձագանքելը, Ռուբեն Ռուբինյանը բորբոքվեց․ «Լսի, արա, հանգստացի մի հատ, վեր ընկի տեղդ»։
Վերջում նա նկատողություն հայտարարեց Արթուր Սարգսյանին։ Երբ միջամտեց ՔՊ խմբակցության պատգամավոր Տիգրան Պարսիլյանը, Ռուբեն Ռուբինյանը նրան ևս նախազգուշացում հայտարարեց։
Տաթև ՀԱՐՈՒԹՅՈՒՆՅԱՆ
