ԱԺ արտահերթ նիստում շարունակվում է քննարկվել «Հայաստան» խմբակցության պատգամավոր Արթուր Սարգսյանի նկատմամբ քրեական հետապնդում հարուցելու թույլտվություն ստանալու միջնորդությունը։
ԱԺ փոխնախագահ Ռուբեն Ռուբինյանն իր ելույթում ասաց, որ ընդդիմությունը սկզբում նմանակում էր ՔՊ-ին, բայց տեսան, որ թավշյա մեթոդներով չի հաջողվում։ «Հետզհետե Վազգեն Գալստանյանը չարացավ, չարիքը պատեց իր ոգին, եւ գնալով իրենց գործողությունները դառնում էին ավելի ու ավելի ոչ խաղաղ, բռնի։ Կհիշեք, որ անցած տարի ԱԺ վրա հարձակում տեղի ունեցավ։ Նպատակն էր գրավել ԱԺ-ն։ Ի վերջո, դա էլ չհաջողվեց, արդյունքում՝ իրենց մեթոդները դառնում էին բռնի եւ բռնի ու հանգեցրին տեռորի»,- ասաց Ռուբինյանը։
Նա մեջբերումներ արեց կալանքի տակ գտնվող Բագրատ սրբազանի եւ մյուսների խոսակցության ձայնագրությունից, որն ընդդիմադիրները մոնտաժված ու համատեքստից կտրված են համարում։ «Ես չեմ հասկանում ոչ խորհրդարանական ընդդիմությանը, ոչ արտախորհրդարանական ընդդիմությանը, թե ոնց է կարելի կանգնել ու անվրդով դեմքով պաշտպանել, չդատապարտել, լղոզել պատասխանատվությունն այն մարդկանց, ովքեր ասում են՝ երկու հոգու գյուլլում ես, 15 հոգու մտցնում ես բանտ, ընտանիքներին տալիս ես կոմպենսացիա, եւ վերջացավ։ Ո՞նց է հնարավոր կոնտեքստից կտրել 2 հոգու գյուլլելու խոսակցությունը։ Ասում էր՝ Նեռ, բայց ինքն է վերածվել Նեռի, պատասխան են տալու իրենց հանցագործությունների համար»,- նշեց Ռուբինյանը։
Կարդացեք նաև
Նա դիմեց ընդդիմությանը․ «Եթե բոլորը մտածեն, որ բռնությունն արդարացված է հանուն ինչ-որ վեհ նպատակների, իսկ բոլոր վեհ նպատակ ունեն, դա կբերի տոտալ քաոսի։ Օրինակ՝ պատկերացրեք՝ ինչ կլինի, եթե ես, ամբողջ ՔՊ-ն մտածենք, որ հանուն վեհ նպատակի ձեզ բոլորիդ պետք է վերացնենք, լավ բա՞ն ա դա»։
Ռոզա ՀՈՎՀԱՆՆԻՍՅԱՆ
