168.am-ը տեղեկություններ էր հրապարակել, որ մինչ Եպիսկոպոսաց ժողովը՝ Սփյուռքից եկած բոլոր եպիսկոպոսներն ու թեմակալ առաջնորդները, ինչպես նաև հայաստանյան եպիսկոպոսներ ու թեմակալ առաջնորդներ անանուն sms էին ստացել՝ հետևյալ բովանդակությամբ՝ «Հայ առաքելական եկեղեցու սիրելի սպասավորներ, խնդրում եմ ձեզ անցնել հետևյալ հղմամբ»:
Տեքստին կցված է լինում մի հղում, որի վրա սեղմելով՝ եպիսկոպոսներն ու թեմերի առաջնորդները բացում են Արայիկ Հարությունյանի՝ հուլիսի 2-ին կատարած գրառումը, որում ասվում է՝
«Կտրիճ Ներսիսյանի հեռանալն ԱՆԽՈՒՍԱՓԵԼԻ է:
Տեղեկացա, որ այսօր տարբեր թեմերից հոգևորականները հավաքվելու են Հայաստանում, ինչը շատ կարևոր է Եկեղեցու ապագայի համար:
Եվ հիմա հոգևորականները ոչ թե պետք է լսեն Կտրիճ Ներսիսյանի խոսքը, թե ինքն ինչպես է օգտագործելու իրենց Մայր Աթոռի շուրջ ճգնաժամը խորացնելու համար, այլ պետք է քննարկեն Կտրիճ Ներսիսյանի անխուսափելի հեռացումից հետո Եկեղեցին ինչպես է գործելու, ով է լինելու տեղապահ և ինչպես է ընթանալու Մայր Աթոռի բարենորոգության գործընթացը»:
«Ուշագրավ է, որ մեր տեղեկություններով՝ Սփյուռքից եկած եպիսկոպոսներից շատերի համարներն իրենց ծառայության վայրերի երկրների հեռախոսահամարներ են, բայց դե, ինչպես ասում են, բա էլ ԱԱԾ-ն ինչի՞ համար է, որ չունենային նրանց համարները»,- գրել էր 168.am-ը:
Ո՞վ է էջմիածնական վերնախավին ուղարկել այս SMS ուղերձը. եպիսկոպոսներն իրենք չգիտեն, Արայիկ Հարությունյանը «Ազատությանը» փոխանցել է՝ ոչ ոքի SMS չի ուղարկել, բայց որ պետք լինի` կուղարկի:
