«Արմենպրեսի» մամուլի սրահում կայացած ասուլիսում Մրցակցության պաշտպանության հանձնաժողովի անդամ Տիգրան Մարկոսյանը տեղեկացրեց, թե ինչ են բերելու իրենց հետ «Տնտեսական մրցակցության պաշտպանության մասին» եւ հարակից օրենքներում կատարված վերջին փոփոխությունները։
«Մասնավորապես խոսքը 3 օրենքներում փոփոխությունների մասին է՝ «Տնտեսական մրցակցության պաշտպանության մասին», «Սպառողների իրավունքների պաշտպանության մասին» եւ «Առեւտրի եւ ծառայությունների մասին» օրենքներում: Այս 3-ի հիմնական փոփոխությունների ակունքը, ըստ էության CEPA-ի (Համապարփակ եւ ընդլայնված համագործակցության պայմանագրի) կիրարկումն է:
ԵՄ-ի հետ կնքված այս համաձայնագրի ճանապարհային քարտեզում նշված են մի շարք պահանջներ, որոնց իրականացմանն էլ ուղղված է այս օրենսդրական փաթեթի ընդունումը»,-ասաց Մարկոսյանը:
Նրա խոսքով.«Պետք է ֆիքսել, որ սպառողների իրավունքների պաշտպանության տեսանկյունից օրենքի հիմնական նորամուծությունն այն է, որ մենք նախատեսում ենք որպես հիմնական իրավունք սպառողի տեսանկյունից՝ սպառողի ազատ ընտրության իրավունքը, որը պետք է խարսխված լինի տեղեկացված լինելու համապատասխան երաշխիքների վրա: Դրան համապատասխան Տնտեսական մրցակցության պաշտպանության օրենքում նախատեսվել է «սպառողների շահերը խախտող գործելակերպ» իրավախախտման տեսակը: Իհարկե, գործող օրենքում էլ ունենք հասարակության մոլորեցման իրավախախտում»:
Կարդացեք նաև
Մրցակցության պաշտպանության հանձնաժողովի անդամն ընդգծում է. «Եվրոպական փորձը հուշում է, որ տվյալ դեպքում իրավախախտման առաջնային օբյեկտ պետք է դիտարկել սպառողների շահերի պաշտպանությունը եւ դրան համապատասխան՝ սպառողների շահերը խախտող գործելակերպ է դիտարկվում նախ ընդհանուր բնորոշմամբ՝ ցանկացած վարքագիծ, որը հակասում է բարեխղճությանը եւ կարող է ազդել սպառողի շահերի վրա, եւ ի թիվս այլնի՝ սրա ներքո են ներառվելու հետեւյալ դրսեւորումները. ապրանքի գնի ներկայացման պահանջների խախտումը, ապրանքի որակի եւ այլ չափանիշների անհամապատասխանությունը, գովազդի հետ կապված համապատասխան խնդիրները եւ այլն»:
Գոհար ՀԱԿՈԲՅԱՆ
