Անձեռնմխելիությունից զրկված ԱԺ «Հայաստան» խմբակցության պատգամավոր Արթուր Սարգսյանն այսօր քննչական կոմիտեից դուրս եկավ առանց հարցաքննության:
«Երեւի աշխատանքային ժամը վերջանում է, խնդրեցին դուրս գանք: Բայց գիտեք՝ Ազգային ժողովում որոշումը տվել են: Իմիջիայլոց, շատ հպարտանալու է, որ պարոն Օհանյանին ու պարոն Մինասյանին 59 ձայն են տվել, ինձ՝ 62 ձայն: Ասացին՝ որոշումը դեռ չենք ստացել: Սպասում ենք՝ հեսա արագ կստանան»,- լրագրողներին ասաց Արթուր Սարգսյանը:
Լրագրողները նրանից հետաքրքրվեցին, թե որպես Սիսիանի նախկին քաղաքապետ ինչ հարաբերություններ է ունեցել Սիսիանից ՔՊ-ական պատգամավորների հետ, օրինակ՝ Կարեն Համբարձումյանի հետ եւ արդյոք իր համար սպասե՞լի էր, որ նման դիրքորոշում կունենային: Ի պատասխան Սարգսյանն ասաց. «Կարեն Համբարձումյանը ինչ է արել, դուք գիտեք, դրա գնահատականը ժողովուրդը կտա»: Ինչ վերաբերում է հարաբերություններին, Սիսիանի քաղաքապետ եղած տարիներին բոլորի հետ լավ հարաբերություններ է ունեցել:
Կարդացեք նաև
Անդրադառնալով «հեղաշրջման պլանին», որի գործով որոշ դրվագներ էլ իրեն է վերագրվում, պարոն Սարգսյանը միայն ասաց՝ այդ գործը փուչիկ է, ժամանակի ընթացքում տրաքելու է:
Արփինե ՍԻՄՈՆՅԱՆ
