«Դատարանից որեւէ դրական ակնկալիք չունեմ, որովհետեւ բոլորս տեսանք, որ այս գործով բոլորին կալանավորեցին»,-լրագրողների հետ զրույցում նշեց ԱԺ «Հայաստան» խմբակցության պատգամավոր Էլինար Վարդանյանը։ Նա Ավան եւ Նոր Նորք վարչական շրջանների դատարանի առաջ հետեւում է պատգամավոր Արթուր Սարգսյանի խափանման միջոցի հարցի քննարկմանը։
Ըստ Էլինար Վարդանյանի, իրավական ու դատական համակարգերի որոշ ներկայացուցիչներ դարձել են այս իշխանությունների հլու կամակատարները։
Ինչ վերաբերում է հուլիսի 8-ին Ազգային ժողովի նիստում տեղի ունեցած ծեծկռտուքին , ապա ըստ Էլինար Վարդանյանի, հրահրվեցին հենց ՔՊ-ական պատգամավորների կողմից։ Այդ ամենին լուռ հետեւում էր գլխավոր դատախազ Աննա Վարդապետյանը։
«Մենք չենք տեսնում դատախազի կողմից որեւէ արձագանք, քանի որ սա այն դատախազն է, որ ինքն է հաղորդում ներկայացրել Սամվել Կարապետյանի գործով։ Այսինքն` մի դեպքում, երբ իրեն հրահանգ են տալիս, որ պետք է կատարվեն որոշակի գործողություններ, որ պետք է անմիտ փուչիկ գործ կարվի՝ շատ ակտիվ ու հետեւողական է։ Իսկ ինչ տեղի է ունենում իր աչքի առջեւ, այս դեպքում ինքը ոչ տեսնում է, ոչ լսում»,-ասաց Էլինար Վարդանյանը։
Կարդացեք նաև
Մանրամասները տեսանյութում
Հիշեցնենք, որ հուլիսի 8-ին Ազգային ժողովը համաձայնություն էր տվել ընդդիմադիր «Հայաստան» խմբակցության պատգամավոր Արթուր Սարգսյանի նկատմամբ քրեական հետապնդում հարուցելու վերաբերյալ ու կալանավորելու՝ գլխավոր դատախազի միջնորդություններին:
Արմեն ԴԱՎԹՅԱՆ
