Այսօր ձերբակալված դաշնակցական 7 երիտասարդի պաշտպաններն ավելի քան երեք ժամ իրենց վստահորդներին տեսակցելու իրավունքից զրկված մնալուց հետո որոշեցին բոյկոտել եւ հեռանալ: Լրագրողները հետաքրքրվեցին՝ արդյոք իրենց պաշտպանյալները չե՞ն տուժի իրենց գնալով, փաստաբան Սերգեյ Հարությունյանը կարճ արձագանքեց՝ կարծում եմ, ոչ:
Հիշեցնենք, որ Քննչական կոմիտեն արդեն տարածել է հաղորդագրություն՝ հայտնելով, որ ահաբեկչության նախապատրաստության դեպքի առթիվ նախաձեռնված քրեական վարույթի շրջանակներում 7 անձ ձերբակալվել է, որոնցից մեկի նկատմամբ հարուցվել է քրեական հետապնդում:
– Նույնիսկ դիմումը մուտք չեն թույլ տվել անել, բարիկադներով ոստիկաններին կանգնեցրել ու փակել են: Այս ամենը հաշվի առնելով՝ մենք՝ փաստաբաններս, որոշում կայացրինք, որ այստեղ չունենք անելիք, որովհետեւ սա հերթական ապօրինի «մասկի շոուն» է լինելու, հերթական իբր ահաբեկչական խմբավորում հայտնաբերելն է լինելու: Հաշվի առնելով, որ արդեն երեք ժամ է՝ արեւի տակ ենք կանգնած ու նույնիսկ ՄԻՊ աշխատակիցների գալուց հետո թույլ չեն տվել, որ մուտք գործենք ներս, մենք հասկանում ենք, որ մեր մասնակցությամբ լեգիտիմացնելու ենք,- լրագրողներին ասաց Սերգեյ Հարությունյանը:
Կարդացեք նաև
Նա նկատեց, որ Բագրատ սրբազանի շոուից հետո, սա էլ երկրորդ շոուն է. «Չգիտեմ՝ շեղում են հասարակությանը դրսում կատարվող իրադարձություններից: Ինչեւէ, հաշվի առնելով, որ մենք չենք ցանկանում լեգիտիմացնել մեր գործողությամբ այս պահին իրականացվող ապօրինությունը, մենք հեռանում ենք այստեղից»:
Անդրադառնալով կոմիտեի տարածած նկարներին, որտեղ երեւում է նռնակ, զենքեր, պարկուճներ եւ այլն, պարոն Հարությունյանը բացատրեց, թե դրանք ինչ կապ կարող են ունենալ այն սպորտաձեւի հետ, որը իրենք՝ պաշտպանները, վերագրում են այս գործով որպես մեղադրյալ անցնող երիտասարդին. «Այդ նռնակը մի սարք է, որը այս սպորտային խաղի ժամանակ է, ինձ ասել են, որ նռնակի մեջ սիսեռի հատիկներ են: Strikeball-ի ժամանակ, երբ իրար կրակում են ներկեր, դա մեր փոքր ժամանակվա կռիվ-կռիվն է, հիմա ժամանակակից կերպով: Խնդիրն այն է, որ սա առիթ դարձավ երկրորդ շոուն պատրաստելու, հանրությանը շեղելու, անձանց մեկուսացնելու: Ինչ-ինչ վտանգավոր, հակահայկական փաստաթղթերի ստորագրելու կամ հայտարարելու ժամանակ մարդիկ, որոնք որ պետք է ոտքի կանգնեին եւ իրենց անհամաձայնությունը հայտնեին, այդ բոլորին մեկուսացնելու ու վախի մթնոլորտ առաջացնելու համար է»:
Արփինե ՍԻՄՈՆՅԱՆ
