Մոսկվայի Սուրբ Պայծառակերպություն հայկական եկեղեցու հոգևոր հովիվ Տ. Քերովբե քահանա Բարսեղյանը հունիսի 27-ին Մայր Աթոռ Սուրբ էջմիածնում ԱԱԾ-ի դիմակավորված աշխատակիցների և ոստիկանների գործողությունները գնահատում է հարձակում Հայ Եկեղեցու վրա: «Թերևս պատմությունից տեղյակ ենք, որ Եկեղեցին բավականին հալածանքներ է կրել, սակայն դրանք եղել են օտար զավթիչների կողմից: Այն, ինչ մեր օրերում է կատարվում ՀՀ իշխանության կողմից՝ ուղիղ հարձակում է Եկեղեցին լռեցնելու համար»,- ասում է տեր հայրը:
Նրա խոսքով՝ կառավարության անդամները փորձում են ճղճիմ կերպով արդարանալ, թե իրենց հարձակումները Եկեղեցուն չեն ուղղված: «Այստեղ պետք է հիշել Ավետարանի պարզ խոսքը, որտեղ ասվում է՝ «Եթե հարվածեն հովվին, ապա հոտը պիտի ցրվի»: Երբ ականատես ենք լինում, թե ինչպես է ՀՀ վարչապետը ամբողջ հայության կաթողիկոսին դիմում ավազանի անունով, ուրիշ կարծիք չի մնում արտահայտելու, քան այն, որ իրենց արածը թիկունքից հարված է հայությանը»,- ասում է տեր հայրը:
