-Արցախահայերի իրավունքների պաշտպանության խորհուրդը՝ մեր համախոհների ու ժողովրդի միջոցով ցույց է տալիս, որ կողմ չենք իշխանությունների գործող քաղաքականությանը արցախցիների վերաբերյալ: Այն պահանջագիրը, որը հրապարակել ենք, ուժի մեջ է, այդ կետերից միայն սոցիալական կետերին են անդրադարձել, որոնց քիչ թե շատ որոշակի լուծումներ են տվել,- այսօր Ազատության հրապարակում արցախցիների կազմակերպած հանրահավաքից առաջ լրագրողների հետ զրույցում ասաց Արցախի նախկին պետնախարար Արտակ Բեգլարյանը:
Նա նկատեց նաեւ, որ ճնշումներ են գործադրվում, որ արցախահայերն իրենց ձայնը չբարձրացնեն. «Ճնշումները տարբեր ձեւերով են արտահայտվում՝ զրույցի տեսքով, տարբեր տեղեր հրավիրել, այդ թվում իրավապահ մարմիններ, ուղիղ, թե անուղղակի սպառնալիքներ հնչեցնել, աշխատավայրերում զգուշացումներ անել, նաեւ տեղեկատվական դաշտում արցախցիներին թիրախավորման դեպքեր. «Սրանք նոր չեն, երբ ակտիվ ենք լինում, ճնշումներն ավելի են ակտիվանում մեր հանդեպ»:
Կարդացեք նաև
Արցախի ԱԺ փոխնախագահ Գագիկ Բաղունցն էլ, անդրադառնալով «հեղաշրջման պլանի» գործով կալանավորված Արցախի ԱԺ պատգամավոր Դավիթ Գալստյանի վերաբերյալ լրագրողների հարցերին, ասաց. «Կարո՞ղ եք որեւէ մի կոնկրետ փաստ բերել, որ էդ մարդը ահաբեկչական ինչ-որ գործունեություն է ծավալել: Ես կոնկրետ չգիտեմ: Արցախցիներին ներգրավում են միայն ամբողջ հայ ազգի իրավունքների պաշտպանության, ազգային անվտանգության ապահովման խնդրում: Ոչ մի ահաբեկչություն արցախցիների կողմից չի պլանավորվում ու չի ձեռնարկվում»:
Արփինե ՍԻՄՈՆՅԱՆ
Լուսանկարը՝ Դավիթ ՂԱՀՐԱՄԱՆՅԱՆԻ
Գագիկ Բաղունցի լուսանկարը՝ Ալեքսանդր ՉԵՐՆԻՇԵՎՍԿՈՒ
