Կառավարությունում ավարտվեց արցախցիների ներկայացուցիչների հետ հանդիպումը։ Արցախի ՄԻՊ Գեղամ Ստեփանյանն ասաց, որ բնակվարձի աջակցության ծրագիրը, այն է՝ 40 հազարական դրամ աջակցությունը չի շարունակվի։ «Այնտեղ նշվեց, որ կառուցողական են տրամադրված առաջարկներ ստանալու, ինչ-որ բարելավումների վերաբերյալ, բայց դե ես իմ անձնական փորձից ելնելով՝ կարող եմ հետեւյալն ասել, որ անիմաստ է»,- նշեց նա։
Գեղամ Ստեփանյանն ասաց, որ հանդիպել են փոխվարչապետի գրասենյակի ղեկավարի հետ։ «Ըստ էության պատասխանը սա էր, բայց ես նկատեցի, որ իրենք անընդհատ ուզում են, որ դա այդպես կոշտ չհնչի, այլ հնչի, որ պատրաստ են կառուցողական քննարկումների»,- նշեց նա։
«Բոլոր քննարկումների ժամանակ էլ այնպիսի տպավորություն է ստեղծվում, որ իրենք ամեն ինչ գիտեն, այսինքն՝ տիրապետում են բոլոր խնդիրներին, եւ մեր բարձրացրած խնդիրներն իրականությանը չեն համապատասխանում։ Բայց թե ինչի համար են հազարավոր, տասնյակ հազարավոր արցախցիներ ամեն օր սոցիալական ցանցերում իրենց դժգոհությունն ու բողոքն արտահայտում, այդ հարցի պատասխանը չունեն։ Այսինքն՝ կամ այլ մոլորակում ենք ապրում, զուգահեռ իրականությունում ենք ապրում, որ չեն տեսնում, որ մարդիկ իսկապես ծանր իրավիճակում են»,- նշեց Ստեփանյանը։
Նա ասաց, որ ժամանակ է պետք, որպեսզի բնակապահովման ծրագրի շրջանակներում ձեռք բերված հավաստագիրը մարդիկ կարողանան իրացնել։ «Օրինակ՝ այս պահի դրությամբ 1900 սերտիֆիկատ կա տրամադրված, որից 300-400-ն է իրացվել։ Ժամանակ է պետք, որ մարդիկ գնան գտնեն այն բնակավայրը, որտեղ ամբողջ կյանքում պետք է ապրեն։ Շատ պարզ հարց ենք տալիս եւ ստանում ենք նույն դակված պատասխանը։ Այդ պատասխանն այն է, որ՝ մենք չենք դադարեցրել բնակվարձի ծրագիրը, դա գործում է միայն այս-այս խմբերի համար։ Այսինքն՝ 50 հազար մարդու զրկել են աջակցությունից, բայց իրենք գտնում են, որ չեն դադարեցրել ծրագիրը»,- նշեց Արցախի ՄԻՊ-ը։
Կարդացեք նաև
Նա հավելեց, որ քննարկել են նաեւ փոքր կազմով ընտանիքների հարցը, կառավարությունում առաջարկում են այդ ընտանիքներին աջակցության հետեւյալ տարբերակը՝ եթե երկու հոգին 6 մլն դրամ պետք է ստանային հավաստագրով, առաջարկում են այդ 6 մլն-ի չափով նրանց բնակվարձի գումար տալ երկարաժամկետ։ Կառավարությունում ասել են, որ այս տարբերակը դեռ քննարկում են, կոնսենսուս չունեն։
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
