Հակակոռուպցիոն դատարանում դատավոր Մերի Մոսինյանի նախագահությամբ դատական նիստում այսօր շարունակվեց Գյումրիի քաղաքապետ Վարդան Ղուկասյանի գործով գրավոր ապացույցների հետազոտումը:
Մերի Մոսինյան
Գործի հատորներից հանրային մեղադրող Թագուհի Հարությունյանի ընթերցած նկարագրություններին Վարդան Ղուկասյանի շահերի ներկայացուցիչ, փաստաբան Արամայիս Հայրապետյանը հակադրում էր իր հակափաստարկները:
Թագուհի Հարությունյան
Նախապես պայմանավորված ծավալով աշխատելուց հետո դատական նիստը հետաձգվեց: Հաջորդ նիստը նշանակվեց հուլիսի 24-ին, ժամը 11:00-ին:
Արամայիս Հայրապետյան
Նիստի ավարտին Արամայիս Հայրապետյանը Aravot.am-ին ասաց. «Այսօրվա նիստում գրավոր ապացույցները հաստատեցին պաշտպանության կողմի այն պնդումները, որ քաղաքի գլխավոր հատակագիծը նախ ինքը որեւէ փաստ հաստատող ապացույց չէ, ընդամենը ռազմավարական պլան է: Իսկ անկյունաքարային նշանակություն կադաստրային քարտեզն ունի, որը մշակում է ոչ թե քաղաքապետը, այլ գլխավոր հատակագծի հիման վրա՝ կադաստրային կոմիտեն: Եվ եթե որեւէ գույք է տարվում գրանցելու, ակնհայտ է, որ կադաստրային կոմիտեն այդ քարտեզի հիման վրա է որոշում, թե հողատարածքը սահմանափակման տա՞կ է, թե՞ սահմանափակման տակ չէ: Սա առաջինը, որ այսօր մի քանի ապացույցներում նիստը հաստատեց:
Կարդացեք նաև
Երկրորդ: Այսօրվա ապացույցներով հաստատվեց նաեւ, որ քաղաքապետը չի հաստատում որեւէ հողամասի գլխավոր հատակագիծ, այլ իրավասու անձինք կազմում են կամ հենց իրենք էլ հաստատում են: Այլ դեպքերում էլ կազմում են եւ բերում քաղաքապետին: Եվ քաղաքապետն արդեն հաստատված հատակագծի մեջ որեւէ փոփոխություն չի կարող անել:
Ավագանին կայացրել է օտարման որոշում: Եվ ավագանու այդ որոշումը քաղաքապետն անգամ դատական կարգով չի կարող բեկանել: Այսինքն, ավագանին կարող է քաղաքապետի որոշումը չեղարկել, իսկ հակառակը հնարավոր չէ: Ավագանու որոշումը բացարձակ նշանակություն ունեցող որոշում է քաղաքապետի համար: Հետեւաբար, եթե ավագանին որոշում է տվյալ տարածքը օտարել ու եթե քաղաքապետը դա չօտարի, այդ ժամանակ նա հանցագործություն կկատարի: Իրավապարտադիր որոշումը չկատարելն արդեն նշանակում է լիազորությունների չարաշահում»:
Մեր դիտարկմանը, թե այդ դեպքում տպավորություն է ստացվում, որ Վարդան Ղուկասյանին ամեն գնով մեղադրանք ներկայացնելու մտադրություն կա, փաստաբանը պատասխանեց. «Ամբողջ տասը էջ փաստաթուղթ հրապարակեցին, որը մեղադրանքի հետ կապ չունի: Օրինակ, Ախուրյան Ձոր-1 հասցեի հողամասի հետ կապված, որը վարձակալությամբ է տրվել, որեւէ մեղադրանք չկա: Ես սկզբնական նիստերում ասացի՝ հատորներ են կազմել՝ պատրանք ստեղծելու, որ տեսեք-տեսեք ինչ գործ ենք բացահայտելու, տեսեք-տեսեք Վարդան Ղուկասյանն ինչ է անում: Բայց երբ արդեն նայում ենք առարկայական հետազոտմանը, ինքը փաստաթղթերի կույտ է հիմնականում եւ ոչ թե փաստական հանգամանքներով լուրջ փաստաթուղթ, որոնցով անձին կարելի է մեղադրել:
Հենց կադաստրի կոմիտեն Ախուրյան Ձոր-1 հասցեի լրիվ տվյալներին տիրապետում է՝ վարելահո՞ղ է, արոտավա՞յր է, վրան շինություն կա՞, թե չկա: Եթե կադաստրային կոմիտեն է այդ տվյալները տիրապետում, քաղաքապետարաննն էլ հարցնում է կադաստրային կոմիտեին, թե այդ հողը ինչ հողատեսք ունի, քաղաքապետարանը որտե՞ղ է կեղծիք կատարել: Այդ կեղծիքը, որը ինչ-որ հետեւանք կունենար, կարող էր կատարել միայն կադաստրային կոմիտեն՝ վերջնական գրանցողը: Եթե փաստաթուղթը տարել են կադաստրային կոմիտե ու ինքն իր քարտեզով տեսել է, որ ամեն բան նորմալ է, քաղաքապետն ի՞նչ անի: Եթե անգամ նորմալ չէ»:
Արամայիս Հայրապետյանը նաեւ տեղեկացրեց, որ գործի ընթացքը հասել է դեռ գրավոր ապացույցների հետազոտման կեսին, բայց կա նաեւ արտավարույթային նյութերի նույնքան ծավալ, որից հետո միայն պետք է լինի մոտ 90 վկայի հարցաքննություն:
Աշոտ ՀԱԿՈԲՅԱՆ
