Երեւանում Արցախի մշտական ներկայացուցչության շենքը «վերադարձնելու» գլխավոր դատախազության նախաձեռնության վերաբերյալ ընդդիմության ներկայացուցիչների ու հատկապես պատգամավորների լռությունը արցախցի փաստաբան Ռոման Երիցյանին շատ է զարմացրել:
-Չտեսա ընդդիմադիր ներկայացուցիչների ու պատգամավորների կողմից ակտիվ եւ բուռն քննադատություն, ինչն ինձ համար խիստ զարմանալի է: Կարծում եմ՝ այս հարցը պետք է արժանանա լուրջ քննադատության ու քաղաքական գնահատական պետք է տրվի,- ուղիղ եթերով ասաց Երիցյանը:
Հիշեցնենք, որ գլխավոր դատախազությունը դիմել է վարչական դատարան, որ անվավեր ճանաչեն Արցախի կառավարության սեփականության իրավունքը այս շենքի նկատմամբ:
Փաստաբան Երիցյանը հիշեցրեց, որ երբ ընդդիմադիր որեւէ ներկայացուցչի քաղաքական հետապնդման կամ բռնաճնշումների են ենթարկում, արցախցիներն առաջինն են նրանց կողքին կանգնում ու առաջինն են քննադատում այդ ամենը. «Մենք կարծում ենք, որ ընդդիմադիրները պետք է կանգնած լինեն արցախցիների կողքին, որովհետեւ բոլորս էլ դարձել ենք ՀՀ իշխանության կողմից վարվող քաղաքականության զոհ»:
Կարդացեք նաև
Փաստաբանը նաեւ դժգոհեց շենքի հարցում հենց արցախցիների միասնական դիրքորոշման բացակայությունից: Ըստ նրա՝ թեեւ արցախցիների մեծ մասը բացասական են վերաբերվում շենքը հետ վերցնելու գործընթացին, բայց. «Չտեսա արցախցիների միասնականություն: Սա շենքի կամ շենքում գտնվող անձանց ամ որեւէ ներկայացուցչի համար պայքար չէ, սա պայքար է նաեւ Արցախի համար, Արցախի ներկայացուցչությունը բոլորիս համար դարձել է խորհրդանշական շենք: Կոչ եմ անում լինել առավել քան միասնական ու վերջ տալ մեկնաբանություններին, թե այնտեղ նստում են թալանչիներ»:
Փաստաբանը նկատեց նաեւ, որ պատահական չեն իշխանություններն ընտրել այս պահը Արցախի ներկայացուցչության շենքը վերադարձնելու առումով: Ըստ նրա՝ տեսել են արցախցիների սակավամարդ հանրահավաքը ու հասկացել, որ եթե նրանք պատրաստ չեն իրենց սոցիալական խնդիրների համար պայքարել, ապա ճիշտ ժամանակն է ոտնձգել նաեւ Արցախի ներկայացուցչության շենքի վրա. «Արցախի ներկայացուցչության շենքն ինձ համար կամ արցախցիների համար չպետք է համարվի լոկ տարածք կամ ինչ-որ շենք: Արցախի ներկայացուցչությունն, իհարկե, չի դադարի, եթե նույնիսկ շենքը մեզնից վերցնեն, բայց այնուամենայնիվ, այդ շենքն ու տարածքը մեզ համար խորհրդանշական տարածք է: Տեղին չեն ձեր հայտարարությունները, թե այդ շենքը պետք է թալանչիներից ազատվի եւ այլն»:
Նա արցախցիներին զգուշացրեց նաեւ, որ ոչ թե ներկայացուցչության շենքը վաճառվելու է ու այդ միջոցներն ուղղվեն իրենց սոցիալական խնդիրներին կամ բնակեցվեն անտուն արցախցիներով, այլ ՀՀ իշխանությունների թիվ մեկ նպատակն է «Արցախի մշտական ներկայացուցչություն» ցուցանակը փոխարինել, օրինակ, Ադրբեջանի կամ Թուրքիայի դեսպանատուն ցուցանակով:
Արփինե ՍԻՄՈՆՅԱՆ
