Իր հոր՝ Հայաստանի ազգային հերոս, մեծ շանսոնյե Շառլ Ազնավուրի արձանի բացմանը «Ազնավուր» հիմնադրամի համահիմնադիր եւ հոգաբարձուների խորհրդի նախագահ Նիկոլա Ազնավուրը, մատնացույց անելով «Երեւան» հյուրանոցը՝ ասաց. «Երբ հայրս գալիս էր Երեւան, կանգ էր առնում այստեղ, այս հյուրանոցում: Եվ սիրում էր իր պատշգամբից տեսահայել այս հրապարակը, որը լեցուն է կյանքով եւ պատմությամբ: Հիրավի, շատ հուզիչ է իմանալ փաստը, որ այսօրվանից Ազնավուրը մեկընդմիշտ կլինի այստեղ, այս հրապարակում:
Հայրս սիրահարված էր Հայաստանին, սիրում էր Հայաստանը կրքոտ: Եվ դա արտացոլվում էր ոչ միայն բառերով, այլ իրականացրած գործունեությամբ: Նա կրել է Հայաստանը իր սրտում եւ համաշխարհային բոլոր հարթակներում: Նա հավատում էր այս երկրի ուժին, հզորությանը, հավատում էր այս երկրի մշակույթին, հավատում էր այս երկրի ապագային: Այդ պատճառով նա շատ խրախուսեց, որպեսզի մենք՝ իմ ընտանիքը, գանք եւ հաստատվենք, ապրենք այստեղ, որպեսզի կարողանանք ապրեցնել եւ իրականություն դարձնել իր երազանքները:
Այս արձանը պատկանում է ողջ հայ ժողովրդին, աշխարհի այն մարդկանց, որոնք սիրել են Ազնավուրին եւ շարունակում են սիրել նրան: Ազնավուրի ընտանիքի, «Ազնավուր» հիմնադրամի անունից խորին շնորհակալություն եմ հայտնում այս մեծ պատվի, այս մեծ տուրքի համար, որն այնքա՜ն խորհրդանշական է, այնքան տեւական եւ այնքան հզոր»,-ասաց Նիկոլա Ազնավուրը:
Կարդացեք նաև
Աշոտ ՀԱԿՈԲՅԱՆ
