«Սա ակնհայտ այն դրվագներից է, որ քաղաքական խոսքի համար օրվա իշխանությունը հերթական անգամ ուղղակի գործադրում է իր լծակը»,-ասաց դատարանի մոտ սպասող ԱԺ «Հայաստան» խմբակցության պատգամավոր Արծվիկ Մինասյանը: Հիշեցնենք, որ Ավան Նոր Նորք ընդհանուր իրավասություն դատարանում քննվում էր քաղաքագետ ԱԺ նախկին պատգամավոր Ռուբեն Հակոբյանի նկատմամբ խափանման միջոցի կիրառման հարցը եւ նա կալանավորվեց երկու ամսով:
«Բոլորին է հայտնի Ռուբիկ Հակոբյանի՝ որպես քաղաքական գործչի քաղաքական սուր խոսքը, ինչը գնահատելի է: Վերցնել այդ խոսքը եւ ներկայացնել քրեական մեղադրանք՝ հավասարազոր է նրան, որ, օրինակ, մարդիկ առավոտյան արթնանան եւ քրեական գործ հարուցեն ընտանիքի այն անդամների նկատմամբ, որոնք հաց են ուտում: Սա այդքան տրիվիալ դեպք է: Ես ծանոթացա նաեւ մեղադրանքի, այսպես կոչված բովանդակությանը, ապշել կարելի է քննչական կոմիտեի այն քննիչների վրա, որոնք նման ստեղծագործական միտք են ներկայացնում»,-ասաց Արծվիկ Մինասյանը:
«Ռուբիկ Հակոբյանը հարցազրույցում խոսել է որպես ժողովրդի մի մաս, նա հստակ արձանագրել է, որ եթե Սահմանադրությունը խախտող անձը չի կատարում կարեւորագույն սահմանադրական պահանջը, չի տալիս հրաժարական, ավելին՝ բռնություններով պահում է այդ իշխանությունը, ապա ըստ էության՝ վրա է հասնում ժողովրդի կողմից իր իսկ իշխանությունը ստանձնելու սահմանադրական պարտականությունը»,-ասաց պատգամավորը:
«ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչությունում իրականացվող քրեական վարույթով փաստական տվյալներ են ձեռք բերվել այն մասին, որ Ռ.Հ.-ն 2025 թվականի հուլիսի 1-ին զանգվածային լրատվության միջոցով՝ հարցազրույց տալու ընթացքում հնչեցրել է իշխանությունը զավթելուն ուղղված հրապարակային կոչ։
Կարդացեք նաև
2025 թվականի հուլիսի 18-ին քննիչի միջնորդության հիման վրա մինչդատական քրեական վարույթի օրինականության նկատմամբ հսկողություն իրականացնող դատախազի որոշմամբ Ռ.Հ.-ի նկատմամբ հարուցվել է հանրային քրեական հետապնդում՝ ՀՀ քրեական օրենսգրքի 422-րդ հոդվածի 2-րդ մասով։
Նույն օրը Ռ.Հ.-ն դատարան ներկայացվելու համար ձերբակալվել է»,- հայտնել են Քննչական կոմիտեից։
Մանրամասն՝ տեսանյութում.
Գոհար ՀԱԿՈԲՅԱՆ
