«Մենք գործ ունենք վերջին շրջանում հատկապես սրվող քաղաքական կլասիկ հետապնդումների հետ, որտեղ ռեպրեսիվ ողջ գործարանը եւ գործիքակազմը՝ այս իշխանությունների հիմնական հենարանը, գործի է դրվել: Եվ սա առաջին դեպքը չէ »,-ասաց դատարանի մոտ սպասող ԱԺ «Հայաստան» խմբակցության պատգամավոր Լիլիթ Գալստյանը: Հիշեցնենք, որ Ավան Նոր Նորք ընդհանուր իրավասություն դատարանում քննվում էր քաղաքագետ, ԱԺ նախկին պատգամավոր Ռուբեն Հակոբյանի նկատմամբ խափանման միջոցի կիրառման հարցը: Նա երկու ամսով կալանավորվեց:
«Մեզ շարունակ կարելի է տեսնել դատարանների առջեւ: Դատարանները դարձել են ռեպրեսիվ գործիքներ: Ուզում եմ հիշեցնել, որ այդ հրահանգը Փաշինյանը տվել է խորհրդարանում, երբ ընդդիմադիրներին ուղղակի ահաբեկեց, պոռթկաց ու սպառնաց՝ բոլորիդ կլցնեմ «ԱԱԾ-ի պադվալները», դա բառիս բուն իմաստով ուղիղ հրահանգ էր ուժայիններին եւ այս ռեպրեսիաների նոր ալիքը նաեւ դրան հետեւեց: Ընդ որում, դա գործեր կարելու 1937 թվի ձեռագիր է՝ հանրությանը պահելու վախի մթնոլորտում, քաղաքական ուժերին, ընդդիմադիր քաղաքական գործիչներին լռեցնելու եւ սեփական իշխանությունը երկարաձգելու ու սեփական աթոռը պահելու համար»,-ասաց Լիլիթ Գալստյանը:
Հիշեցնենք, որ քննչական կոմիտեից հայտնել էին. «ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչությունում իրականացվող քրեական վարույթով փաստական տվյալներ են ձեռք բերվել այն մասին, որ Ռ.Հ.-ն 2025 թվականի հուլիսի 1-ին զանգվածային լրատվության միջոցով՝ հարցազրույց տալու ընթացքում հնչեցրել է իշխանությունը զավթելուն ուղղված հրապարակային կոչ։
2025 թվականի հուլիսի 18-ին քննիչի միջնորդության հիման վրա մինչդատական քրեական վարույթի օրինականության նկատմամբ հսկողություն իրականացնող դատախազի որոշմամբ Ռ.Հ.-ի նկատմամբ հարուցվել է հանրային քրեական հետապնդում՝ ՀՀ քրեական օրենսգրքի 422-րդ հոդվածի 2-րդ մասով։
Կարդացեք նաև
Նույն օրը Ռ.Հ.-ն դատարան ներկայացվելու համար ձերբակալվել է»։
Մանրամասն՝ տեսանյութում
Գոհար ՀԱԿՈԲՅԱՆ
